ASCENSO IMPARABLE DE POSITIVOS EN GALICIA INCLUÍDA A ÁREA PONTEVEDRA-SALNÉS

É unha nova mala xornada nos datos da pandemia de coronavirus en Galicia. Segundo o balance estatístico remitido pola Consellería de Sanidade este sábado, o número de casos activos na Comunidade sitúase en 1158, 105 máis que os datos anunciados o venres cando había 1053 casos activos. Se se fan os cálculos, xa que este dato non se ofrece, serían 137 positivos máis en Galicia. Xusto unhas horas despois de que o ministro de Sanidade, Salvador Illa, anunciase novas medidas, Galicia segue aumentando as súas cifras a un ritmo alto. De todas as maneiras, os efectos destas medidas tardarán uns días en verse. Algunhas delas, como o peche do lecer nocturno, aínda non se produciu, ao ter que aparecer reflectida a medida no Diario Oficial de Galicia, algo que aínda non ocorreu. A área sanitaria da Coruña e Cee aglutina a gran maioría de casos e apúntase unha importantísima subida de novo. De momento non se notan esas restricións, aplicadas o venres da semana pasada, xa que a zona agrega 85 casos novos, o 78% dos totais de Galicia. A Xunta decidiu non pechar a zona e seguir permitindo a mobilidade cara a dentro e fóra de concellos como o da Coruña. A área sanitaria conta xa con 700 casos activos, o 60% dos positivos galegos. Resultados similares no resto de áreas, salvo Vigo, que baixa cinco casos, de 134 a 129. Lugo suma outros cinco, de 99 a 104, Ourense leva outros cinco máis, de 73 a 78, Pontevedra suma sete, de 52 a 59, Santiago catro, de 42 a 46 e Ferrol sete, de 35 a 42. En Galicia son xa 44 as persoas que necesitan estar hospitalizadas pola enfermidade. Son dous máis que as anunciadas o venres. Segue sen haber ningún paciente en UCI e os mortos continúan en 623. Hai 32 persoas curadas máis, chegando a cifra ás 11.559. Fixéronse ao redor de 2.600 PCR máis, alcanzando as 277.462.

PONTEVEDRA-SALNÉS

Este sábado, segundo os datos facilitados polo  Servizo  Galego de  Saúde (SERGAS), na área sanitaria de Pontevedra e O Salnés contabilízanse 59 (7 máis que onte) casos activos por Covid-19.

Dúas persoas ingresaron nas últimas horas no Complexo Hospitalario Universitario de Montecelo (CHUP) cos protocolos Covid e atópanse en planta á espera de comprobar a súa evolución durante os próximos días. 

O resto de casos, un total de 57, son pacientes que se atopan nos seus domicilios evolucionando e con seguimento por parte dos médicos do seu estado.