SEGUNDO UN ESTUDO , GALICIA SERÁ UN DESTINO ESTRELA ESTE VERÁN

Un estudo liderado polo profesor do Departamento de Organización de Empresas e Comercialización da USC, Jakson Renner Rodrigues Soares, xunto co Grupo de Investigación Turismo, Economía e Sustentabilidade ( GTES) da Universidade Estadual do Ceará en Brasil analizou como se comportarán as persoas residentes en España á hora de elixir destino na nova normalidade e as conclusións, extraídas de máis de 850 enquisas realizadas en todo o territorio nacional, constatan que os destinos máis citados son Canarias, Andalucía e Galicia, zonas que durante a pandemia presentaron un mellor comportamento. “Cando se lles pregunta polos principais atractivos turísticos, as persoas apostan polo sol, a praia, a cultura e a natureza como principais motivos para elixir destino”, indica o autor do estudo. A partir da pregunta inicial de “planificou vostede algunha viaxe para os próximos meses?”, o estudo constata que os enquisados non teñen intención, en liñas xerais, de renunciar ao turismo como parte da súa axenda de lecer, aínda que mostran o seu propósito de apostar, na medida do posible, polos destinos próximos “para contribuír á recuperación económica do sector”, precisa o informe. Outra das conclusións do estudo é a maior preocupación dos turistas por asegurar o investido na viaxe ante posibles imprevistos derivados da situación sanitaria. Respecto diso, a enquisa mostra outras preocupacións do viaxeiro como a seguridade do espazo elixido ou o interese pola calidade do sistema sanitario da rexión á que se espera viaxar. Pola contra, os enquisados manifestan que manterán o seu interese por relacionarse coa poboación local e non cambiarán os seus hábitos á hora de probar a gastronomía do destino. Á hora de analizar os posibles cambios de plans e destinos, o informe apunta que a maior parte das persoas que planificaran unha viaxe dentro de España (69%) manterá a súa intención, mentres que o 25% das persoas con viaxes internacionais previstas considera cambiar de destino. Así, os resultados do informe reforzan a idea de que o turismo máis próximo vai saír reforzado. “Ademais de España, Portugal e Italia tamén son vistos como destinos á alza nas viaxes post Covid-19”, explica Rodrigues Soares.