SEGUE A BAIXAR O NÚMERO DE FALECIDOS EN GALICIA

O falecemento doutras tres persoas diagnosticadas con coronavirus, en hospitais elevou a 372 o número de vítimas mortais da pandemia na Comunidade, segundo os datos facilitados este luns pola Consellería de Sanidade. Trátase dun home de 70 anos ingresado no CHUO de Ourense, e un home de 95 e unha muller de 75 no CHUAC coruñés, todos con patoloxías previas.
Sanidade informaba este luns pola mañá da morte de tres mulleres, todas elas con patoloxías previas. Trátase dunha muller de 87 anos de idade que estaba ingresada no Complexo Hospitalario Universitario de Ourense, unha muller de 75 anos ingresada no Complexo Hospitalario Universitario da Coruña, e unha terceira muller, de 88 anos, ingresada no Complexo Hospitalario de Ferrol. A Consellería ademais notificou outros tres falecementos de persoas que permanecían en centros xeriátricos diagnosticadas de coronavirus. En concreto, ao longo do domingo morreron unha persoa na residencia Portazgo da Coruña, outra na DomusVi de Cangas (Pontevedra) e unha terceira na DomusVi Barreiro, en Vigo. Así, o cómputo global de mortes coñecidas ata o momento, contando vítimas en hospitais e en xeriátricos, alcanza as 372. En hospitais producíronse 290 falecementos, mentres que en residencias foron 82.