LEVE ASCENSO DE FALECIDOS HOXE MARTES

O falecemento de dúas persoas nas últimas horas eleva as mortes por coronavirus en Galicia a un total de 386, nunha xornada de martes na que repuntan as vítimas mortais coñecidas ata 14 (nove en hospitais e cinco en residencias), segundo datos da Consellería de Sanidade.

A Consellería de Sanidade informou esta tarde da morte de dúas persoas, unha muller de 91 anos no CHUS e un home de 79 no CHUAC, ambos con patoloxías previas, coas que o reconto de vítimas en Galicia ascende a 386.

Na actualización matinal o Sergas informa de sete falecementos por Covid-19 que elevaban neses momentos o total en Galicia a 379. Os falecidos eran un home de 55 anos ingresado no CHUS de Santiago, un home de 82 no CHUAC coruñés, un home de 71 no CHUF de Ferrol, un home de 85 no CHUO ourensán e unha muller de 84 e dous homes de 83 e 90 anos no CHUVI de Vigo. Todos eles, salvo o home falelcido no CHUAC, presentaban patoloxías previas.

Había que engadir tamén os cinco maiores que falecían onte luns en centros de anciáns galegos. En concreto, un na residencia As Fragas, en Pontedeume (A Coruña); dous na residencia A nosa Señora da Esperanza de Ourense; outro na residencia Moledo de Vigo; e outro na residencia DomusVi Cangas (Pontevedra).

Os 14 falecidos comunicados este martes superan as nove vítimas mortais do luns. Con todo, son menos que as rexistradas o pasado domingo (16), así como o venres e sábado, 21 en ambos os casos. Con estes datos, o número de falecidos con COVID-19 nos hospitais galegos elévase a 299: 87 na área sanitaria da Coruña, 62 na área de Vigo, 57 mortes na área de Ourense, 41 falecidos na área sanitaria de Santiago, 20 en Ferrol, outros 20 en Lugo e 12 falecidos na área de Pontevedra. A estas mortes hai que sumar os 87 falecidos en residencias de maiores computados ata o luns (as cifras van cun día de atraso neste caso). Así mesmo, do total de vítimas en Galicia, 168 (o 43,75 por cento) están vinculados a residencias pero morreron en hospitais ou en centros integrados.