AS AXENCIAS DE VIAXES SATISFEITAS COAS MEDIDAS DO GOBERNO

As principais asociacións de axencias de viaxes de España, encabezadas por CEAV, UNAV e ACAVe -que en conxunto agrupan a máis de 5.000 puntos de venda- mostraron a súa “gran satisfacción” pola aprobación por parte do Goberno do sistema de bonos que lles autoriza a emisión de bonos con validez dun ano, en lugar de proceder á devolución do diñeiro polas viaxes contratadas pero non realizados durante o estado de alarma. Segundo José Luis Méndez, presidente de UNAV, trátase dunha “magnífica noticia que alivia a un sector maltratado e, sobre todo, que confire aos consumidores maiores garantías, pois tal e como estaba agora xeraba un verdadeiro problema tanto ás axencias como aos viaxeiros”. De acordo con Méndez, a implantación unilateral do sistema de bonos por parte das compañías aéreas creaba ás axencias de viaxes “un verdadeiro problema” tanto aos clientes como ás axencias e situaba a estes últimos “nun plano de verdadeira indefensión para cumprir coa Lei de Viaxes Combinadas”. Esta medida, impulsada polo Ministerio de Consumo a pedimento das citadas asociacións, xustifícase porque as axencias quedaban desprotexidas, dado que tiñan que anticipar o diñeiro aos clientes, xa que actúan como intermediarios de aerolíneas, hoteis ou outras compañías. Lembran as axencias que varios países europeos, entre eles Francia, xa autorizaran este sistema.

Galicia.- Pola súa banda, a Xunta, a través da Consellería de Cultura e Turismo, está a perfilar unha serie de medidas para impulsar a recuperación do sector turístico e minimizar o impacto que terá a crise sanitaria do coronavirus. Así, Román Rodríguez, mantivo un encontro por videoconferencia con representantes dos principais operadores turísticos galegos - Abramar, CN Travel, Interrías e Tee Travel, e na que tamén estivo o presidente do Agrupación industrial Turismo de Galicia, Cesáreo Pardal- no que destacou que o Goberno galego ten en planificación un investimento de máis de 25 millóns de euros para, entre outras medidas, deseñar accións de promoción unha vez finalice a crise, conceder axudas directas ao sector ou desenvolver novos produtos turísticos. Os operadores turísticos fixeron unha serie de achegas que o conselleiro se compromete a ter en conta á hora de poñer en marcha medidas de apoio. Román Rodríguez insistiu na necesidade de manter unha “intensa” colaboración público-privada, máis aínda nestas circunstancias. Entre as iniciativas postas en marcha por parte do Goberno galego no campo do turismo destaca o Plan de teleformación a través do Centro Superior de Hostalería de Galicia que aspira a chegar a máis de 2.000 persoas. Os dous primeiros cursos celebrados esgotaron prazas e este mes están programados outros oito.