PRESENTADA UNHA NOVA EDICIÓN DE “ VOANDO NAS RÍAS BAIXAS”

A presidenta da Deputación de Pontevedra, Carmela Silva, xunto á deputada de Medio Ambiente e Transición Ecolóxica, Iria Lamas, e do coordinador de SEO Birdlife en Pontevedra, Gustavo Ferreiro, presentou este venres a terceira edición de “ Voando nas Rías Baixas”, un programa que a través de cinco roteiros guiados permitirá ao público coñecer de forma gratuíta a riqueza ornitolóxica da provincia de Pontevedra. Carmela Silva destacou que “o respecto ás aves e á contorna onde se desenvolven é unha aposta moi firme deste goberno, e moito máis nesta provincia, onde temos uns espazos marabillosos”. Doutra banda, apuntou que estas actividades “son un elemento de atracción deste turismo de natureza sustentable e respectuoso co medio ambiente que queremos promover”. Gustavo Ferreiro, de feito, destacou a aposta do goberno de Carmen Silva polo medio ambiente e a programación deste proxecto “que permite que a xente se sensibilice coa natureza, así como coñecer a través das aves territorios que temos preto cun altísimo valor ecolóxico, á vez que se conciencia coa súa conservación”. O primeiro roteiro terá lugar o 26 de xaneiro para observar aves acuáticas e mariñas da enseada de San Simón, zona protexida pola Rede Natura 2000. O prazo para inscribirse comeza o luns 13 e acaba o día 22.
A segunda celebrarase o día 16 de febreiro e será polo Complexo Intermareal Umia-O Grove, reserva ornitolóxica máis grande de España. Os interesados poderán anotarse desde o día 3 ao 12 de febreiro.
En canto á seguinte excursión, será o 8 de marzo polo Estuario do Río Miño e a Foz dá Ramallosa onde hai unha gran variedade de aves palustres. Para esta, o prazo para participar ábrese o 24 de febreiro ata o 4 de marzo.
O cuarto roteiro desenvolverase o 31 de maio nas Brañas de Xestoso onde se atopan aves rapaces e, para poder velas, é necesario inscribirse entre o 18 e o 27 de maio.
Por último, o quinto roteiro farase na Serra do Suído o 21 de xuño onde se poderán observar grandes aves rapaces. O prazo para rexistrarse estará aberto desde o 8 ao 17 de xuño.