APARECE MORTO NO MAR O EX DIRECTOR DA BANDA DE MÚSICA DE VILANOVA

O corpo sen vida do ex-director da banda de Vilanova, Jesús Nogueira,

foi localizado esta noite aboiando no peirao da Aduana de Vilanova de Arousa, a uns catro metros de terra.

Foron os axentes da Garda Civil os que alertaron ao 112 Galicia da presenza do cadáver ás 5:10 horas.

Decontado, os xestores do CIAE 112 Galicia puxeron a situación en coñecemento de Urxencias Sanitarias de Galicia-061, de Salvamento Marítimo, do Servizo de Gardacostas de Galicia, dos Bombeiros do Salnés e da Agrupación de Voluntarios de Protección Civil da localidade.

Segundo se lle indicou ao 112 Galicia, o persoal de Salvamento Marítimo recuperou o corpo sen vida do home e, pola súa banda, as forzas da orde tratan, agora, de esclarecer as circunstancias deste suceso.

A súa filla denunciara a súa desaparición tras non saber nada del desde as 3 da tarde de onte.
Todo apunta a que a morte foi accidental. Desde a súa retirada tiña na pesca o seu hobby.