AMIGOS DE GALICIA PERSONARASE COMO ACUSACIÓN PARTICULAR NO CASO DO CURA ACUSADO DE ABUSOS EN CAMBADOS

A Fundación Amigos de Galicia, personarase como acusación particular no caso dos supostos abusos sexuais a menores dun salesiano de Vigo nun campamento de Cambados.
Están presentados noutros seis casos en Galicia, entre outros, o do triplo crime machista de Valga ou no caso dos bebés xemelgos de Ourense.

Os feitos remóntanse a xullo pasado, cando varias familias presentaron denuncia nos xulgados polos supostos tocamentos aos seus fillos por parte deste sacerdote, cando estaban nun campamento en Cambados.

A dirección do Colexio María Auxiliadora apartou de inmediato a S.C.V., veciño de Cambados, e púxose a disposición das familias denunciantes, así como das autoridades policiais e xudiciais. "Baixo ningún concepto toleraranse comportamentos que menoscaben a integridade dos mozos e mozas", trasladou a congregación relixiosa cando se coñeceron os feitos.


Un total de sete familias presentaron denuncia ata a data contra un salesiano de Vigo, S. C.V., de 40 anos, por supostos abusos sexuais aos seus fillos menores durante un campamento o pasado mes de xullo en Cambados.
Ás catro denuncias iniciais sumáronse outras tres, segundo confirmaron fontes policiais, dúas delas de dous menores que no primeiro atestado xa eran consideradas vítimas e ademais testemuñas e que interpuxeron a denuncia con posterioridade, prestando declaración en Comisaría. O sacerdote foi detido e enviado a prisión provisional o pasado 22 de xullo despois de prestar declaración perante o xulgado de instrución 1 de Cambados en funcións de garda. O arresto produciuse despois de que a fin de semana anterior, durante un campamento de verán, varios dos mozos relatasen a unha das educadoras varios episodios nos que o denunciado someteulles a tocamentos, cando eles durmían.