OS DATOS DA EPA EN GALICIA SON PÉSIMOS

O paro subiu en 3.100 persoas no terceiro trimestre en Galicia en relación co trimestre anterior (+2,2%), ata 143.500 desempregados (a taxa queda no 11,5%), segundo a Enquisa de Poboación Activa (EPA) publicada este xoves. Na provincia de Pontevedra os datos da EPA do terceiro trimestre do ano son positivos xa que o paro baixou en 4.200 persoas. Mentres, a ocupación creceu en 6.900 persoas neste período e alcanza os 1.105.700 ocupados na Comunidade. Deste xeito, a taxa de ocupación elévase en 0,2 puntos ata o 47,3%. En cambio, en España o paro baixou en 16.200 persoas no terceiro trimestre do ano, o que supón un 0,5% menos que no trimestre anterior, ata situarse o total de desempregados en 3.214.400 persoas, o seu menor nivel en once anos, segundo a EPA.

Por comunidades, Galicia rexistra o sexto aumento relativo do paro, con Navarra á cabeza (+7,6%). Este trimestre hai unha decena de autonomías nas que se reduce o paro, liderado por Baleares (-30,9%). Na Comunidade galega, respecto ao mesmo trimestre de 2018, a caída do desemprego foi en 9.500 persoas, un 6,2% menos. Os ocupados son 9.200 máis que 12 meses atrás, un 0,8% máis. A taxa de paro en Galicia sitúase no 11,5%, máis de dous puntos por baixo da media española, que se atopa no 13,92% no terceiro trimestre. Para os homes, a taxa de paro é inferior (9,8%) que para mulleres (13,3%).