O PECHE DA EXPOSICIÓN DE BERTA CÁCCAMO COINCIDE COA PRESENTACIÓN DUN LIBRO SOBRE A SUA OBRA

O próximo martes, 5 de novembro, ás 19:30 no Pazo Torrado. coincidindo coa clausura da Exposición de Berta Cáccamo preséntase o libro sobre a súa obra.

Berta Cáccamo. Enteiramente pintado: rexistro dun percorrido vital é o título da primeira exposición que se lle dedica á artista galega logo da súa morte. Un ano e medio logo do seu pasamento a sala de exposicións EsPazo Torrado en Cambados abreu as portas, o pasado 27 de setembro, dunha selección de corenta cadros da artista canda a cadernos, debuxos e diferentes obxectos que repasan a súa traxectoria creativa. A exposición, que Cáccamo comprometera en vida, desenvolveuse grazas á colaboración do seu irmán, Xosé María Álvarez Cáccamo co comisario Juan de Nieves.

A súa morte intempestiva con apenas 54 anos sacudiu a pintura galega. Atrás quedou unha extensa, valorada obra, que partiu a mediados dos 80 de calidades matéricas para se adentrar na mancha, na intuición, na síntese. 

“Berta Cáccamo representa unha figura bastante singular na pintura galega”, explicaba De Nieves a Sermos Galiza, “que se formou fóra e tivo uns referentes distintos aos dos seus coetáneos”. Nada en Vigo en 1963, Cáccamo estudou en Catalunya. Foi alí onde coñeceu a influencia que máis decisivamente marcou a súa primeira etapa: o informalismo de Antoni Tàpies. Incorpora ademais trazos expresionistas e segue o seu camiño.

Que a leva, xa na década dos 90, a formular a súa propia linguaxe. “Abstracta, en que o material resulta tan importante como a propia pintura. Ten especial querenza polas lonas, que ela mesma recolle e sobre as que traballa”, sinala De Nieves, quen liga a arte de Berta Cáccamo ao concepto de intuición. “Foi unha artista dunha inusual intuición pictórica”, di, “cuxa obra parece ter unha vontade fóra, máis alá do propio xesto”.

40 cadros en Cambados
É esta pintura a que se expón en Berta Cáccamo. Enteiramente pintado: rexistros dun percorrido vital. Confórmana uns 40 cadros, cinco ou seis obxectos escultóricos e uns dez cadernos “importantísimos para coñecer o seu proceso creativo” e que inclúen debuxos e reflexións estéticas.