INVESTIGADAS TRES PERSOAS POR FURTO DE HORTALIZAS

A Garda Civil identificou e investiga á propietaria dun restaurante do municipio de Meaño (Pontevedra) e a dúas persoas que colaboraron con ela de forma habitual como presuntos autores dun furto continuado de hortalizas.

O propietario da leira puxo unha denuncia asegurando que desde hai varios anos estaba a ser prexudicado por estes roubos nunha parcela situada nas proximidades do restaurante. O valor das hortalizas subtraídas este ano poden superar os 1.500 euros, segundo informaron os axentes.

A semana pasada, a Benemérita recibiu unha alerta do 062 informando da presenza de varias persoas con lanternas na leira que conseguiron darse á fuga cando a patrulla chegou ao lugar.

As sospeitas confirmáronse cando a Garda Civil localizou o vehículo da propietaria do restaurante estacionado nas inmediacións da parcela.

Unha hora máis tarde, a patrulla controlou a chegada do mesmo coche conducido pola propietaria cando regresaba ao seu domicilio. No asento traseiro levaba unha fouce e no maleteiro gardaba tomates e cenorias.

A propietaria, de 55 anos, e as dúas persoas que a acompañaban e que tamén traballaban no restaurante, dous homes de 40 e 45 anos, foron notificados como presuntos autores dun delito continuado de roubo.

A investigación continúa aberta para concretar o número de persoas afectadas por este furto. As dilixencias instruídas entregáronse no Xulgado de Instrución de Garda de Cambados.