APARECE MORTA UNHA DAS ASESINAS DO CAMBADÉS SECUNDINO PREGO

Aparece morta na súa cela do cárcere de Mansilla de las Mulas, en León, Rocío Gondar, unha das dúas mulleres condenadas polo asasinato do cambadés Secundino Prego, octoxenario de Poio ao que quedou probado que mataron a golpes cunha tixola en 2014. 

Segundo fontes próximas ao centro penitenciario Rocío Gondar, presuntamente, suicidouse na súa cela e foi atopada polos funcionarios de prisións cando tiña que acudir á quenda de ceas. Cumpría unha condena de vinte anos e medio. A outra das mulleres, tamén condenada por asasinato, permanece presa no cárcere da Lama.

Rocío Gondar fora condenada, en decembro do 2016, polo brutal crime de Secundino  Prego. O xurado popular considerou probado que Rocío Gondar e  Albertina Táboas, coidadoras do ancián, puxéronse de acordo para matalo. Os feitos ocorreron o 2 de febreiro do 2014. Segundo o veredicto do xurado, ambas lle atacaron nun camiño cando regresaba a casa. «Golpeáronlle repetidas veces na cabeza con diversos obxectos, unha tixola cuxo mango rompeu, o propio bastón de Secundino, que tamén rompeu e unha pedra», dixo o xurado.  

Ditaminouse tamén que foi o móbil económico o que moveu ás dúas mulleres. Non en balde, considerouse que  Albertina, quen días antes do crime fora declarada herdeira universal da vítima, tiña medo a que Secundino  Prego cambiase o testamento. Mentres que Rocío Gondar actuou polo diñeiro que lle prometeu  Albertina.