ÉXITO NA PREESTREA DE "QUIEN A HIERRO MATA" ESCRITA POLO CAMBADÉS JUAN GALIÑANES

A produtora galega Vaca Films preestreou esta noite na Coruña a súa longametraxe "Quien a hierro mata".
O equipo da película, dirixida por Paco Plaza e protagonizada por Luis Tosar, neste primeiro pase especial, previo á súa chegada mañá venres ás carteleiras de cine de toda España, estivo presente.

A Consellería de Cultura e Turismo contribuíu cun investimento de 260.000 euros, dos que 240.000 euros corresponden á subvención obtida en 2017 na convocatoria anual da Agadic para producións e coproducións audiovisuais, e outros 20.000 euros foron destinados á súa fase de preprodución a través das axudas de 2016 a desenvolvemento de proxectos de cinema e televisión.

A Xunta apoia a película cara á súa chegada á gran pantalla baixo a produción de Vaca Filmes e AtresMedia Cine. Durante este proceso, contaron tamén coa implicación como coprodutora da empresa francesa Playtime, en asociación con Sony Pictures, e a participación de Televisión de Galicia, Atresmedia, Movistar +, Canal+ e Netflix, ademais de coas achegas do Instituto de las Cinematografía y de las Artes Audiovisuales (ICAA) e do programa Media da Unión Europea.

Rodaxe en Galicia

Rodado integramente en Galicia, con localizacións na Coruña, Cambados, Vilanova de Arousa e A Illa de Arousa, este thriller parte dunha idea orixinal do galego Juan Galiñanes, quen asina tamén o guión xunto a Jorge Guerricaechevarría.

Luis Tosar, María Vázquez e Xan Cejudo, falecido uns meses despois da rodaxe, encabezan o elenco interpretativo que lle dá vida a esta crónica dunha vinganza, narrada cunha gran carga dramática e de acción. Quien a hierro mata explora o lado máis escuro do ser humano, abordando temas como a traizón, as relacións familiares ou a violencia que xera o narcotráfico.