ACTIVADA PARA MAÑÁ UNHA ALERTA LARANXA POR TEMPORAL COSTEIRO E POR VENTO NA CORUÑA, PONTEVEDRA E LUGO

A Dirección Xeral de Emerxencias e Interior da Vicepresidencia da Xunta activará a partir de mañá a alerta laranxa por temporal costeiro e por vento nas provincias da Coruña e Pontevedra; e por temporal costeiro en Lugo.

Segundo informa a Axencia Estatal de Meteoroloxía (AEMET), o episodio adverso costeiro de nivel laranxa comezará ao redor das 10,00 da mañá no oeste e suroeste da Coruña e na costa da provincia de Pontevedra. En torno ao mediodía estenderase tamén ao noroeste da Coruña e a primeira hora da tarde chegará ao litoral lucense. Agárdanse ventos de forza 8 ou 9, e mar combinada con ondas de entre 4 e 7 metros.

Ademais, tamén se activará durante a mañá a alerta laranxa por vento no resto das provincias de Coruña e Pontevedra, onde se poderán acadar refachos máximos de 100 quilómetros por hora.

Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos da provincias afectadas; Deputacións, servizos provinciais e agrupacións de voluntarios de Protección Civil e aos clubs náuticos, entre outros. Deste xeito, agárdase que se adopten as medidas oportunas para garantir a seguridade dos bens e das persoas.

Debido ao temporal costeiro, recoméndase evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos ou vixiar posibles caídas de obxectos desde balcóns e fiestras. Permanecer lonxe da costa, praias, rompentes, paseos marítimos, espigóns, peiraos ou todas aquelas zonas que podan ser varridas polo mar.

Tamén se aconsella a suspensión das actividades pesqueiras e marisqueiras como medida preventiva naquelas zonas máis perigosas. Tamén se recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

Ademais, aconséllase consultar a páxina web do CAE 112 (www.112galicia.org), que conta con información meteorolóxica e con enlaces de interese.

Por outra banda a Comisión Escolar de Alertas tomou a decisión de suspender mañá, xoves 6 de xuño, as actividades no exterior dos centros educativos das provincias da Coruña e Pontevedra debido a un fenómeno meteorolóxico adverso de nivel laranxa por refachos de vento superiores a 100 km/hora que comezará ás 12 horas e se prolongará ata as 20 horas

Como é habitual, no caso de que as circunstancias da localidade onde se atopa o centro supuxesen un risco superior ao declarado e pasase a unha declaración de nivel superior, as direccións poderán adoptar as decisións oportunas respecto da suspensión das actividades extraescolares.