PALACIO DE FEFIÑANES, SELECCIONADA COMO UNHA DAS MELLORES ADEGAS DO MUNDO

Bodegas del Palacio de Fefiñanes foi seleccionada como unha das TOP100 adegas no ránking que anualmente publica a prestixiosa publicación norteamericana Wine & Spirits Magazine. Unha mención especialmente significativa se temos en conta que a adega da D.O. Rías Baixas é unha das nove que a revista seleccionou en España, dúas delas galegas, o que demostra o gran recoñecemento que os viños galegos están a obter nun mercado de tanto peso como o estadounidense.
Esta inclusión supón, ademais, que a adega de Fefiñanes aparece na 32ª Guía Anual de Compras Wine& Spirits e que os seus viños formarán parte da Cata Especial que se celebrará o próximo 9 de outubro en San Francisco, a 15ª Top 100 Tasting, na que se honrará ás 100 mellores adegas do ano. Un evento no que se darán cita profesionais do sector de todo o mundo que poderán degustar o Albariño de Fefiñanes III Ano, a elaboración catada polo xurado e cuxos excelentes resultados permitíronlle a Adegas Palacio de Fefiñanes obter esta distinción. A mención supón un novo recoñecemento ao bo facer da adega cambadesa que desde a súa creación apostou por elaboracións nas que a variedade Albariño alcanza a súa máxima expresión. Máxime se temos en conta que a inclusión neste ránking prodúcese despois de que os editores e panelistas de Wine & Spirits avaliasen máis de 15.500 elaboracións de adegas de todo o mundo, a maior cifra catada nos quince anos en que leva elaborando este ránking.