AS VI XORNADAS DE DEGUSTACIÓN E MARIDAXE DOS AUGARDENTES E LICORES TRADICIONAIS DE GALICIA EN CAMBADOS

As VI Xornadas de Degustación e Maridaxe dos Augardentes e Licores Tradicionais de Galicia contarán coa participación do televisivo Dani Polo. O mozo meigo finalista do concurso de TVE Pura Maxia é a principal novidade do programa deste ano, que se desenvolverá o próximo 3 de novembro no Salón José Pena de Cambados. Así o anunciou a vogal do Consello Regulador Sonia Otero na presentación da cita ante os medios de comunicación. Un acto no que estivo acompañada polo concelleiro de Enoturismo cambadés, José Ramón Abal, a quen agradeceu "a súa colaboración para o desenvolvemento desta iniciativa". Como en anteriores ocasións, a asistencia ás actividades propostas para esta xornada é de carácter gratuíto, previa inscrición. Todas as persoas interesadas en participar deberán reservar a súa praza a través do teléfono 986 520 786 ou enviando un correo electrónico a turismo@cambados.es. Túnel dos Augardentes e Licores Tradicionais de Galicia As VI Xornadas de Degustación e Maridaxe darán comezo o sábado 3 pola mañá coa apertura do Túnel dos Augardentes e Licores Tradicionais de Galicia. O horario de visita, no que as persoas asistentes poderán degustar unha ampla variedade de referencias de destilados galegos con selo de calidade, será de 12.00 a 14.00 e de 15.30 a 20.30 horas. As actividades comezarán ás 16.00 horas co Taller de Cata A Maxia do Augardente, que estará dirixido por Sonia Otero e que contará coa participación de Dani Polo. A vogal do Consello Regulador non quixo desvelar en que consistirá dita colaboración do mozo meigo, pero si asegurou que "haberá algunha que outra sorpresilla que non deixará a ninguén indiferente".

A continuación, ás 18.00 horas, terá lugar as proposta Augardentes e Licores Tradicionais na cociña e a coctelería. Como en anteriores ocasións, o chef do Casino A Toja, Mark Wernink, e o cociñeiro do Hotel Eurostars Illa da Toja, Fran Castro, prepararán en directo tres pratos entre cuxos ingredientes se atopan os destilados galegos con selo de calidade e orixe. Tamén os utilizará o barman Anxo Camiña para elaborar tres cócteles creados especialmente para a ocasión. A outra novidade do programa deste ano pasa pola colaboración do presidente da Asociación de Repostería Tradicional de Melide Melide Terra Doce, Alberto Rodríguez. "Colaborador habitual do Consello Regulador e firme defensor dos nosos produtos amparados, preparará en directo dúas deliciosas elaboracións que harmonizarán os Augardentes e Licores Tradicionais de Galicia coa repostería melidense", indicou Sonia Otero. Tanto o concelleiro cambadés José Ramón Abal como a vogal do Consello Regulador animaron á poboación para participar estas xornadas. En palabras de Otero, "son unha oportunidade única para descubrir o potencial dos destilados galegos con selo de calidade e orixe", á vez que conciencian "sobre a importancia de consumir augardentes e licores debidamente etiquetaxes".


www.orujodegalicia.org