TINO CORDAL ANUNCIA A SÚA CANDIDATURA PARA REPETIR COMO CANDIDATO Á ALCALDÍA DE CAMBADOS

O actual portavoz de Somos Cambados, Tino Cordal, anunciou a súa candidatura para repetir como candidato á alcaldía.

Así o fixo público na Asemblea que Somos Cambados celebrou onte, na que se acordou o proceso de primarias que a formación política abre a partir de hoxe de cara ás eleccións municipais do vindeiro ano.

Pola súa banda o outro edil de Somos Cambados, Xurxo Charlín, manifestou que non se vai presentar como candidato e "só vai continuar neste proxecto político se Somos continua liderado por Tino Cordal" tras catro anos traballando xuntos polos veciños de Cambados.

Cordal agradeceu ás persoas que participaron na Asamblea o apoio mostrado ao longo destes anos pero dixo que "ainda queda moito traballo que facer a nivel municipal, por iso non dubidou en volver a manter o compromiso cos veciños de Cambados outra lexislatura en caso de saír elixido".

Tamén quixo deixar claro que "a súa candidatura non debe ser entendida como un obstáculo a que este proxecto se abra a participación de outras".

O prazo para a presentación de candidaturas rematará o 31 de outubro.

Para elo, Somos Cambados vai poñer a disposición dos veciños un formulario elaborado a tal efecto que se pode descargar da páxina web da formación ou solicitalo expresamente aos membros da Comisión Electoral que se creou no día de onte para este proceso.

"O obxectivo é que o proceso sexa aberto a cidadanía, sendo a unica formación política de Cambados onde se establece un sistema radicalmente democrático, no que calquera veciño se pode postular a candidato para as eleccións municipais e ser elixido polas bases", afirman.

O regulamento do proceso estará publicado a partir deste luns para a súa consulta na web de Somos Cambados.

Fonte: Arousa Sí Radio