DOUS DETIDOS ARMADOS CANDO TENTABAN ROUBAR UNHA PLANTACIÓN DE MARIHUANA EN CORBILLÓN

A Garda Civil detivo a dous veciños de Vigo pola suposta intención de roubar unha plantación de marihuana na parroquia de Corvillón, en Cambados (Pontevedra). Nesta operación, tamén foron detidos un veciño de Ribadumia como suposto inductor e colaborador e ao dono da plantación por un delito de tráfico de drogas e o seu pai como colaborador. Os feitos tiveron lugar sobre as 2:00 horas da madrugada xoves para venres cando este veciño de Cambados informaba a Garda Civil que fora obxecto dun intento de roubo con intimidación cando se atopaba nun invernadoiro que ten preto do seu domicilio. Segundo o seu relato, dous individuos armados con revólveres intimidárono efectuando varios disparos ao aire para que os levara ao interior da leira. Tras manter un forcexeo con eles conseguiu escapar e pedir axuda desde a casa dun veciño, segundo informou a Garda Civil. Neste momento, os detidos déronse á fuga levándose o vehículo e o teléfono móbil do dono do invernadoiro. Unha patrulla da Garda Civil logrou interceptar o vehículo a pouca distancia do invernadoiro, pero no seu interior tan só había un dos supostos atracadores con arma de fogo real. O segundo foi localizado tres horas despois escondido nunhas matogueiras e en posesión dun revólver de fogueo no polígono industrial de Tremoedo na localidade Vilanova. Ao volver ao invernadoiro, os axentes sorprenderon ao dono e ao seu pai cortando as plantas de marihuana polo que se incautaron de preto dunha trintena de plantas sendo detidos como supostos autores dun delito contra a saúde pública. En relación con este intento de roubo tamén se detivo a un veciño de Ribadumia acusado dun delito de atentado contra os axentes da autoridade xa que na madrugada dos feitos cruzouse coa Garda Civil e na súa fuxida da zona tentou arrolar co seu vehículo a un dos axentes cando pretendía interceptalo.