DETIDOS CINCO VECIÑOS DO SALNÉS, DOUS DE CAMBADOS, POR CULTIVAR 50 PLANTAS DE MARIHUANA

A Garda Civil detivo esta semana a cinco veciños da comarca do Salnés, catro homes e unha muller, que foron sorprendidos infraganti cando colleitaban unha plantación de marihuana no municipio de Portas. Procedeuse á detención destas cinco persoas que foron sorprendidas na plantación: J. P. R., e A. P. C., pai e fillo, con domicilios en Ribadumia e Vilanova, respectivamente; JA. L. R., de Cambados e a súa parella MD. F.S., de Vilanova e C. P.M., veciño de Cambados. Dous dos detidos teñen antecedentes por tráfico de drogas. Por mor das pescudas realizadas polo Equipo de Investigación da Compañía da Garda Civil de Vilagarcía de Arousa, en colaboración co Posto de Caldas de Reis, tívose coñecemento dunha plantación de cannabis sativa nunha leira contigua a unha vivenda situada na parroquia de Romay do municipio de Portas. Ao inspeccionar a leira, a Garda Civil localizou a cinco persoas que estaban a colleitar os cogollos dunha plantación de marihuana no interior dun invernadoiro contiguo á vivenda. Segundo as investigacións realizadas, os responsables da plantación alugarían a leira e o baixo da vivenda, unicamente para fins de cultivo, secado, tratamento e elaboración da marihuana. No invernadoiro, que estaba perfectamente dotado dos correspondentes sistemas de iluminación e ventilación, incautáronse cincuenta plantas de considerables dimensións, de 2 e 3 metros de altura. No baixo da vivenda interviñéronse varias caixas e sacos cunha importante cantidade de ramas cortadas, previamente seleccionadas. As cinco persoas foron detidas como supostas autoras dun delito contra a saúde pública, por cultivo ou elaboración de estupefacientes. Con esta actuación, enmarcada dentro dos servizos que a Garda Civil de Pontevedra ten activados para a detección e erradicación de puntos de produción, venda e distribución de substancias estupefacientes, evitouse que as doses que se puidesen obter da marihuana intervida destináronse ao tráfico de drogas. As dilixencias instruídas polos efectivos da Garda Civil, xunto coas plantas intervidas, foron postas a disposición do Xulgado de Instrución núm. 2 de Caldas de Reis, onde deberán comparecer os detidos cando sexan requiridos.