A Xunta promocionará a Festa do Viño Albariño

A Axencia Turismo de Galicia e o Concello de Cambados (Pontevedra) asinaron este xoves un convenio para a promoción da Festa do Viño Albariño, unha das doce festas de interese turístico nacional que teñen este recoñecemento na Comunidade e que celebrará a súa LXVI edición o próximo mes de agosto.

A Festa do Albariño é unhas das máis xenuínas de Galicia, sendo a festa vitivinícola máis antiga da Comunidade e a segunda de España. En total, Galicia conta nestes momentos con 141 eventos repartidos por todo o seu territorio que gozan dalgún tipo de interese turístico: nove a nivel internacional, doce a nivel nacional, e 120 a nivel autonómico.

A directora de Turismo de Galicia, Nava Castro, valorou a "importancia" desta festividade, á que cualificou como un dos "mellores expoñentes" do potencial enoturístico da Comunidade galega.

Neste sentido, destacou a súa contribución para que cada día sexan máis os viaxeiros interesados na enogastronomía galega, unha das principais motivacións á hora de viaxar. Concretamente, é xa a segunda razón pola que visitan a Comunidade.

Ademais, Castro manifestou que o Goberno galego ten claro "que temos que seguir coidando do enoturismo", apostar pola excelencia e ter "moi en conta" que a Comunidade é "líder en calidade neste campo".

E é que, segundo subliñou, case a metade das adegas españolas co distintivo 'Q' de Calidade Turística atópanse en Galicia. Por iso, apelou a ser "conscientes de que é un dos principais protagonistas de festas" como a Festa do Viño Albariño, indicou a directora de Turismo de Galicia.