O CETMAR ORGANIZA EN CAMBADOS UN TALLER SOBRE O BERBERECHO

CETMAR organiza en Cambados un taller sobre o berberecho para expoñer os avances do proxecto COCKLES aos axentes interesados O Centro Tecnolóxico do Mar-Fundación CETMAR e os seus socios no proxecto COCKLES para a recuperación do marisqueo do berberecho organizan o próximo 13 de xullo na Confraría de Pescadores de Cambados un taller para dar a coñecer os avances desta iniciativa europea e para debater cos axentes interesados sobre o presente e futuro deste recurso. Durante a xornada, que se desenvolverá ao longo da mañá, presentaranse os traballos levados a cabo no marco do proxecto en relación ao estado das poboacións, xestión do recurso e patoloxías que o ameazan, en particular a marteiliosis. A continuación celebrarase un debate aberto a todos os participantes co fin de identificar os aspectos de maior interese para o sector local. A inscrición ao taller é gratuíta e para rexistrarse como asistente é necesario completar o formulario de inscrición ou ben contactar con transferencia@cetmar.org antes do 6 de xullo. Coordinado pola Fundación CETMAR e polo Centro de Investigacións Mariñas -CIMA-, o proxecto COCKLES conta coa participación doutros socios galegos como son a Universidade de Santiago de Compostela, o Instituto Tecnolóxico para ou Control do Medio Mariño ( INTECMAR), a Secretaría Xeral de Calidade e Avaliación Ambiental da Xunta de Galicia e a Confraría de Pescadores San Antonio de Cambados, en cuxa sede se celebra o taller.
Financiado polo programa INTERREG da Unión Europea, esta iniciativa que leva por título “Cooperación para a recuperación das pesqueiras de berberechos e os seus servizos ambientais na área Atlántica” parte da base de que este recurso proporciona beneficios ambientais, socioeconómicos e culturais significativos ás comunidades costeiras dos países implicados en COCKLES (España, Portugal, Francia, Reino Unido e Irlanda). Con todo, o berberecho atópase ameazado por enfermidades e unha xestión ás veces ineficiente. Recuperar ambas as cousas, é dicir, a produción e os servizos que proporciona ás rexións citadas é a finalidade deste proxecto, que se prolongará ata finais de 2020.