O CAMBADÉS J.L. ARAGUNDE GUÍA DA NOVA ACTIVIDADE DA RUTA DO VIÑO RÍAS BAIXAS

A Ruta do Viño Rías Baixas estreará a súa programación anual de actividades cunha importante novidade: Catas de viño da D.O. Rías Baixas de adegas asociadas harmonizados con actuacións musicais e coas conservas galegas proporcionadas por Anfaco- Cecopesca. “Quixemos ir un paso máis aló nas Catas entre Amigos axuntando viño, gastronomía e música, xa que a súa harmonización parécenos en grao sumo adecuada”, explica a xerente da asociación sen ánimo de lucro, Lorena Varela. 

Así, as ‘Notas de Cata’ combinarán os comentarios sobre as distintas elaboracións presentadas, que realizará o catador cambadés José Luís Aragunde, coa música en directo e en acústico dun dueto de violín e violoncelo. Cada un dos viños degustados estará acompañado por unha canción e, ao final da cata, ofrecerase unha degustación de conservas de peixes e mariscos de Anfaco- Cecopesca, xunto cun pequeno concerto. 

Este ciclo iniciará o seu percorrido o próximo 16 de marzo, ás 20.00 horas, na sede do Consello Regulador da Denominación de Orixe Rías Baixas (Pontevedra). O prezo desta actividade é de 8 euros e a adquisición de entradas débese realizar no portal de Ataquilla. com. A continuación, e grazas á colaboración do Corte Inglés, desenvolveranse nos centros comerciais da insignia na Coruña -na rúa Ramón e Cajal- (13 de abril), Santiago de Compostela (20 de abril) e Vigo (27 de abril); mentres que o broche de ouro ao ciclo poñerase no Corte Inglés de Porto (Portugal). 

A Ruta do Viño Rías Baixas tamén introducirá novidades nas Xornadas de Puertas Abertas das Rutas do Viño de Galicia, que se celebrarán en maio. Así, ademais dos tradicionais Buses do Viño, propoñeranse actividades onde a música e a maxia tomarán especial protagonismo. Para a conmemoración do Día Europeo do Enoturismo ofrecerase unha versión renovada da xa consolidada Cata Amateur.