CAMBADOS PEDIRÁ APOIO Á MANCOMUNIDADE PARA LOGRAR A SEDE DA D.O. RÍAS BAIXAS

O Concello de Cambados presentará ante a Mancomunidade do Salnés unha proposta para que a entidade comarcal apoie a reivindicación de que a capital do Albariño sexa a sede do Consello Regulador da Denominación de Orixe Rías Baixas. Tras aprobarse esta reivindicación no pleno da corporación municipal cambadesa, a moción enviouse aos demais concellos da comarca do Salnés, que foron aprobando sucesivamente e por unanimidade a demanda de Cambados.

Unha vez aprobada a moción polos nove concellos que integran a comarca, o seguinte paso era presentala ante a Mancomunidade do Salnés que, segundo o goberno local, "con toda probabilidade, aprobará a reivindicación cambadesa na próxima reunión que terá lugar nas próximas semanas". Ademais dos concellos do Salnés, Cambados está a enviar cartas a outros concellos que forman parte da Denominación de Orixe Rías Baixas para facerlles partícipes da súa demanda e pedirlles o seu apoio. No caso de que a moción sexa aprobada pola xunta da Mancomunidade do Salnés, trasladarase ao Parlamento galego, onde será defendida polo grupo parlamentario de En Marea, no que se atopa o grupo municipal de Somos Cambados. Desde esta formación, esperan contar co voto favorable dos demais grupos da Cámara galega e tamén teñen a intención de solicitarlles o seu apoio ás adegas e aos viticultores da Denominación de Orixe Rías Baixas.