2 DE ABRIL. DIA MUNDIAL DE CONCIENCIACIÓN SOBRE O AUTISMO

A Confederación Autismo España e a Confederación Española de Autismo (FESPAU), en coordinación con Autismo Europa, promoven unha campaña de concienciación para dar a coñecer este trastorno á sociedade e atraer a atención sobre as necesidades e a realidade das persoas con Trastorno do Espectro do Autismo (TEA) e as súas familias.

"Rompamos xuntos barreiras polo autismo. Fagamos unha sociedade accesible" é o tema elixido este ano 2017 para celebrar o 2 de abril o Día Mundial de Concienciación sobre o Autismo.

As persoas con autismo enfróntanse a numerosas barreiras á hora de gozar dos seus dereitos fundamentais e de formar parte plenamente da comunidade.

As barreiras ás que se enfrontan varían en función de cada individuo e das súas necesidades específicas. Para o movemento asociativo do autismo é moi importante que a sociedade entenda cales son as barreiras ás que se enfrontan as persoas con TEA porque iso permitirá unha mellor adaptación ás súas necesidades e reforzará a inclusión destas persoas en todos os ámbitos da sociedade.

O 2 de abril conmemórase o Día Mundial e Nacional de Concienciación sobre o Autismo. Por iso, miles de asociacións e institucións únense para loitar pola inclusión e os dereitos das persoas con autismo.

Estas son algunhas claves que axudan a entender o trastorno:

- Estímase que en España existen preto de 450.000 persoas con autismo.

- É o trastorno psicolóxico predominante entre os menores.

- Nos últimos anos, o número de casos de autismo foi en aumento. Aínda que non se sabe con exactitude cal é a causa, crese que pode estar relacionado coa forma na que se detecta o trastorno.

- Entre os afectados, existen persoas cunha gran diversidade intelectual. Algúns teñen unha discapacidade intelectual significativa e outros completaron os estudos superiores, falan varios idiomas e posúen varios masters.

- Entre un 70 e 90% de persoas co espectro autista están desempregadas, a pesar de ter unha gran formación. Isto é debido a que nos procesos de selección prímase as competencias sociais.