O XUVEN CERRA O PLANTEL E ARRANCA A CAMPAÑA DE SOCIOS

A marcha do seu técnico Miguel Ángel Hoyo tras a súa fichaxe en Dinamarca supuxo o punto de partida para un Xuven Cambados cuxo novo proxecto deu comezo apostando pola continuidade xa desde o banco. O ascenso de Manu Santos tras cinco tempadas como axudante foi a primeira "fichaxe" do club amarelo. 
O bloque nacional mantense como a aposta do club pola continuidade para poder dar un importante paso á fronte para as primeiras semanas de competición.

Da tempada pasada mantéñense Shota Gelazonia, de 207 cm nado en 1994, que tras entrar pola porta grande do Xuven e axudarlles a alcanzar a permanencia, converténdose no seu home máis importante. O Xuven fixo todos os esforzos posibles en renovalo. Shota seguirá crecendo en Cambados onde se espera que sexa a xogador franquiciaa e sen dúbida un dos xogadores máis importantes e dominantes da categoría. Os seus números nos 5 partidos que puido disputar con Xuven foron 15 puntos, 9'6 rebotes, 2'2 asistencias e 0'8 tapóns para 21'4 de valoración para axudar ao equipo para alcanzar a permanencia.

Erik Quintela foi o segundo en renovar. O base lucense chegou a un acordo para a súa renovación e o club deposita no xogador moitas esperanzas para que se converta nunha peza importante do equipo na primeira tempada de Manu Santos á fronte do banco de O Pombal.

O base Adrián Chapela continuará unha tempada máis dirixindo o xogo do Xuven na liga LEB-Plata despois de alcanzar un acordo que lle permite continuar na entidade cambadesa un ano máis.
Este xogador forma parte da plantilla do Breogán de Lugo, que aceptou a súa cesión ao Xuven ao considerar que o xogo e a categoría na que milita contribuirían á súa evolución deportiva. 

O último en renovar foi Sergi Quintela. O canteirán do Estudantes de Lugo completou unha tempada moi, moi regular cuns números de 11 puntos, 2.6 rebotes e 9.9 de valoración estatística. Todo iso cunhas porcentaxes do 41% en tiros de campo e do 80% en tiros libres.

No capítulo de fichaxes, o primeiro foi Juan Rubio (Murcia, 17 de novembro de 1995). Rubio, pasou unha tempada dura de autosuperación tras sufrir unha lesión a media tempada que o apartou dos adestramentos e convocatorias do equipo ACB do UCAM Murcia cos que realizou a pretemporada e chegou a ir convocado durante a liga Regular. Recuperouse e volveu ao grande, con fantásticas actuacións tras asinar no UCAM B no tramo final da Fase de Descenso do Grupo E de Liga EBA. Tras ser un dos referentes do seu equipo en Liga EBA e polas súas condicións físicas e técnicas, Juan está chamado a ser un dos nomes propios da liga na que será a súa campaña de debut na LEB Prata.

O inglés Matthew Don, de 22 anos, promediou a pasada tempada 16 puntos e 12 rebotes. De feito, foi o máximo reboteador da liga EBA.
Un xogador moi atlético, moi intenso e moi activo, con moita capacidade de rebote. Don achegará ao equipo a enerxía, algo do que tiñan carencia o ano pasado. Ademais, destaca a súa capacidade de xogar por encima do aro, rebotear e defender, ademais de ser moi activo en defensa.
Matthew Don formouse durante os últimos anos en Estados Unidos, onde formou parte do plantel da Universidade de Cameron en Oklahoma, da NCAA II, onde disputou 28 partidos cunha media de 19 minutos por partido, 6 puntos e 5 rebotes.

O equipo cambadés confirmaba a incorporación ás filas do club do escolta Brantley Osborne. Osborne, de 25 anos, conta con 1,93 metros de estatura e, do mesmo xeito que  Matthew Don, formouse en Estados Unidos, concretamente na Universidade de Sheperd da NCAA2. No seu último ano universitario conseguiu 20 puntos, 5 rebotes e 3 asistencias. Ademais, destaca o seu corenta por cento en tiros de 3 puntos e a súa competitividade en cada partido, movéndose de maneira extremadamente defensiva.
A principal arma de Osborne é o tiro, aínda que tamén conta coa capacidade de xerar sen balón, a partir de bloqueos e cortes.
Chega procedente do Narón, ao que chegou o pasado mes de setembro. Alí realizou unha gran tempada na liga EBA, onde promediou case 20 puntos, 4 rebotes, 3,4 asistencias e excelentes porcentaxes de tiro (41 % en tiros de 3), sendo o segundo máximo anotador da liga regular.

O regreso de Charles Nkaloulou a Cambados convirteuno na 4º fichaxe. O á pivote de 2,02 metros e 22 anos de idade, formado no seu día no Estudantes de Lugo e o Breogán, regresa así ao club no que xa triunfou, para achegar o seu poder reboteador e anotador desde a súa posición natural de 4.

Pedro José Romera (Xaén, 28 de setembro de 1988) converteuse na 5ª incorporación . Un cinco puro de 210 centímetros forxado na canteira do Maristas de Xaén, que na tempada 2010/11 daba o salto á EBA da man do C.B. Novaschool de Javier Imbroda, e que tras transitar polo C.B. Aridane canario, o Quintanar de Cuenca, e o C.B. Andújar e C.B. Cazorla de Xaén na mesma categoría, a pasada campaña cumpría un soño, militar na ACB nas filas dun CAI Zaragoza que o seguía a través dos seus contactos en Málaga. Os 13,1 puntos, 10,5 rebotes e 20,2 de valoración por partido no C.B. Cazorla na tempada 2014/15 son as últimas medias de referencia de Romeu, que no CAI apenas xogou.

E para completar o plantel, a directiva fichou a Manny Ogunfolu un tres con corpo de catro, de 203 centímetros de estatura e 100 quilogramos de sólido físico.
Formado na Universidade de Southern Indiana, a mesma de Stephen Jackson ou a recente fichaxe do Unicaja de Málaga Jamar Smith; tras completar a súa etapa na NCAA 2 Ogunfolu xogou as dúas últimas campañas no Rockville Victors da ABPL, unha das ligas profesionais existentes por baixo da NBA no baloncesto dos EE.UU. Na última campaña, complementando o ano no Pichincha de Bolivia.

O Xuven iniciou tamén a campaña de captación de socios con esta mensaxe:

TI ES A NOSA MELLOR FICHAXE!!
Iniciamos a campaña de abonados ao Xuven. Necesitamos a túa axuda para construír un equipo forte e competitivo, pero sobre todo queremos que formes parte do club, da familia do Xuven, que veñas a O Pombal e SINTAS A MAREA!

Os prezos para esta tempada serán os mesmos que a tempada pasada coa novidade do carné Especial, que inclúe o abono Individual, asento reservado no pavillón, entrada gratis os días do club e bufanda.
Os prezos son:

Especial: 100€
Individual: 60€
Familiar: 80€
Xubilado: 50€
Xuvenil (16 a 22 anos): 30€
Infantil (ata 15 anos): 20€
Asento reservado: 15€

Os mesmos poderanse retiran na oficina do club no pavillón, de luns a venres de 19 a 21 horas.

¡¡¡FAITE SOCIO!!!