RESPOSTA DE MANOLO DOMÍNGUEZ AS INSINUACIÓNS DO PP DE PONTEVEDRA

Sobre as estúpidas insinuacións que está a facer o PP de Pontevedra e por extensión ao post das páxinas rancias afíns ao Partido Popular de Cambados

Pensa o ladrón que todos son da súa condición. Un concelleiro do partido das caixas B e os sobres, do caciquismo e as chantaxes sexuais para acceder a un posto de traballo, e con varios destacados militantes en prisión e outros tantos no xulgado, pensa que todo o mundo comparte a súa forma de funcionar. “Se está en política será para facer caixa”, pensa na súa miope forma de entender o mundo e en especial a participación política. 
Pois non. Como a tanta outra xente, a min a militancia e os cargos orgánicos que ostento no BNG (ningún deles remunerado) cóstanme cartos, de modo directo: cota de afiliado (ordinarias e extras), rifas e loterías, milleiros de km en desprazamentos, teléfono, substitucións no traballo para poder asistir a reunións… Todo iso sae do meu peto, dos meus ingresos como educador ambiental profesional dende hai máis de 15 anos.

Si, 15 anos, traballando entre outros para concellos e administracións xestionadas por todas as cores políticas. E sí, incluíndo a Xunta e Concellos do PP, coma os de calquera outra cor. Entre a miña nómina de clientes inclúense, entre outros, a Xunta de Fraga e Feijóo, o Concello de Sanxenxo nas épocas de Telmo e Catalina, e o de Meaño na de Jorge (D.E.P. ). Con estas tres últimas persoas coincidín en órganos de participación (representando ao ecoloxismo), defendendo posicionamentos contrarios aos seus, sen recibir por iso unha persecución no ámbito profesional, ou polo menos sen notala. Nisto, como noutras cousas, o equipo de Jacobo Moreira marca o seu listón, á altura das cloacas. 

No caso que nos ocupa, non é que o Concello de Pontevedra me “premie” por ser responsable comarcal do BNG, nin sequera por ser militante, pois a miña relación profesional co Concello de Pontevedra remóntase a 2001, sendo mesmo anterior á miña afiliación política. O exemplo citado, ademais, é ben significativo: Noites Abertas, no cal ademáis de impartir obradoiros ambientais propios, fago a contratación de monitores/as que doutro modo non poderían impartir actividades neste programa. Descontando gastos de contrato e seg. Social (14 persoas, este ano), IVE, material e asesoría, o que eu cobro neto finalmente polo meu traballo é aproximadamente o 10% do importe da factura. O programa é significativo, ademáis, por estar cofinanciado nun 70% polo Plan Nacional sobre Drogas do Ministerio de Sanidade, Plan que se mantén económicamente con cartos e bens incautados a narcotraficantes, eses con tan boas relacións coa dereita e con Feijóo en particular. 

Sei que para moita xente do PP as palabras “honestidade” e “profesionalidade” non significan nada. Mesmo pensan que co acoso persoal e as falsidades van facer recuar aos seus adversarios.  Pinchan en óso. Ataques rastreiros coma este amosan que imos na dirección correcta.