A DESEÑADORA CAMBADESA EVA SOTO PROTAGONISTA NA CIDADE DA CULTURA

CON-FÍO EN GALICIA

A Cidade da Cultura de Galicia convértese nunha pasarela de moda na que mostrar o peso do téxtil galego no mundo a través da exposición "Con-Fío en Galicia", unha homenaxe a un sector que conseguiu situar Galicia nun lugar de referencia no panorama internacional.

Ao longo de 300 pezas, "Con?Fío en Galicia" ofrece un percorrido por un sector estratéxico, constituído por 300 empresas que dan emprego a unhas 13.000 persoas e que representan o 6,5% da riqueza da comunidade. Uns 100 looks singulares da moda feita en Galicia, reinterpretacións contemporáneas de indumentarias históricas, valiosas coleccións privadas e unha selección de material fotográfico e audiovisual guían ao visitante polos fitos máis destacados da nosa historia téxtil.

Comisariada polo historiador Miguel Anxo Seixas Seoane, a mostra pon o foco en momentos craves do noso sector téxtil: a eclosión que se viviu nos anos 80 en Galicia coa famosa "La arruga es bella" de Adolfo Domínguez, as creacións de Roberto Verino, Antonio Pernas ou o grupo "Galicia Moda" (Gene Cabaleiro, Florentino, Caramelo, María Moreira, María Mariño); e o fenómeno Inditex, hoxe primeiro grupo téxtil do mundo. Xunto a eles, destacados valores do deseño actual como Sara Coleman, Eva Soto ou José Castro, que visten a iconas como Lady Gaga ou as protagonistas de "Sexo en Nova York".

Para chegar aquí, o téxtil galego percorreu un longo camiño que "Con-Fío en Galicia" recrea a modo de paseo pola Historia: desde a Idade de Pedra ata o Romanticismo, desde o inicio da produción de liño ás sastrerías e as primeiras industrias téxtiles como a empresa de máquinas de coser Refrey ou Camisería Regojo de Redondela, que contou con Dalí como modelo das súas campañas publicitarias. Pinturas, obxectos e documentos complementan as recreacións históricas realizadas por alumnos de ESDEMGA, a EASD Mestre Mateo ou da galega Arantza Vilas de Pinaki Studio -responsable, entre outros, do vestiario da serie "Xogo de Tronos"- cun único obxectivo: proporcionar os patróns necesarios para confeccionar o traxe da moda galega.


Do 11 de marzo ao 11 de setembro de 2016
De martes a domingo, de 10:00 a 20:00 horas
Museo Centro Gaiás - Entrada de balde.