A CAMBADESA ALBA TRIGO CAMPEONA DE ESPAÑA DE VELA

A cambadesa Alba Trigo segue dando grandes triunfos á vela galega. Aos seus quince anos, acaba de anotarse unha nova vitoria á súa xa extenso palmarés. Esta fin de semana proclamouse campioa de España de clase Optimist. Fíxoo durante un campionato nacional que se disputou en augas de Las Palmas de Gran Canaria.

Nesta proba, participaron un total de 150 regatistas de doce comunidades españolas. Galicia estivo representada por unha vintena de deportistas.

A pesar dos esforzos da tripulación galega, o campionato non empezou nada ben para eles debido ás adversas condicións meteorolóxicas. Con ondas de ata tres metros, ventos de vinte nós e sete longas horas de competición, Alba Trigo -actualmente nas filas do equipo Movistar e pertencente ao RCN Sanxenxo- finalizaba a primeira xornada na posición 90 da clasificación xeral.

Ao día seguinte, aínda que o tempo mellorou, os regatistas tiveron que enfrontarse de novo a unha manga moi longa, o que converteu a proba nunha carreira de resistencia. E a moza cambadesa saíu beneficiada, mellorando ata o posto número 63, logrando grandes parciais nesta xornada.

Pero, sen dúbida, o terceiro día foi moito mellor. Alba Trigo, tras un segundo posto, logrou coarse entre as trinta primeiras e xa na última xornada de competición chegou o triunfo.

Comezou cun mal parcial asinando unha 43ª posición na primeira proba, pero na segunda manga logrou cruzar a meta na segunda praza. A última manga ía decidir o campionato e a moza pontevedresa pronto se situou nos postos de cabeza, logrando impoñerse na proba decisiva e alzándose co título por diante da catalá Iset Segura.

Así, Alba Trigo convértese na primeira galega que conquista un título nacional de Optimist.

Ademais deste triunfo, a regatista pontevedresa foi cuarta no campionato de España por autonomías, formando equipo con Jacobo García, Martín Wizner, Alejandro Pérez e Yago Casto. Tan só caeron, en dúas probas moi disputadas, contra Baleares e Andalucía. Ambas derrotaron á tripulación galega por 2 parciais a 1.

Vía Pontevedra Viva