IV CATA AMATEUR RUTA DO VIÑO RIAS BAIXAS

O Salón José Peña de Cambados acolleu onte a celebración da IV Cata Amateur Ruta do Viño Rías Baixas, que estivo dirixida polo catador Nacho Costoya. Este foi o acto central do programa especial preparado con motivo do Día Europeo do Enoturismo.

Preto dun centenar de persoas participaron na cuarta edición desta cita, onde se degustaron 25 referencias de viños da Denominación de Orixe Rías Baixas pertencentes a adegas asociadas desta entidade sen ánimo de lucro e situadas nas subzonas de Val do Salnés, O Rosal e Condado do Tea. Foron un total de 21 as persoas que conseguiron recoñecer os tres viños da cata a cegas despois de completar unha degustación inicial de cinco marcas. De todos os vencedores da IV Cata Amateur realizouse un sorteo dun enopack de fin de semana en establecementos asociados da Ruta do Viño. A agraciada, neste caso, foi Emilia Martínez que gozará de visitas a adegas e dun aloxamento por unha noite nunha casa rural.

A inauguración da IV Cata Amateur estivo presidida polo membro da xunta directiva da Ruta do Viño Rías Baixas Antonio Méndez; a alcaldesa de Cambados, Fátima Abal Roma; o xefe territorial da Consellería do Medio Rural, Miguel Ángel Pérez Dubois; o deputado provincial de Turismo, Santos Héctor Rodríguez Díaz, e o concelleiro de Enoturismo cambadés, José Ramón Abal. Todos os participantes coincidiron á hora de encomiar as iniciativas postas en marcha desde a Ruta do Viño Rías Baixas e a súa importancia como referente do enoturismo non só a nivel galego, senón máis aló das fronteiras autonómicas.