COMISADOS 280 Qs DE MARISCO NA RÍA DE AROUSA

Axentes do Servizo de Gardacostas, en colaboración con axentes da Garda Civil do Servizo Marítimo de Pontevedra, requisaron esta mañá 280 quilos de marisco e 12 salabardos nun operativo desenvolvido na Ría de Arousa. Esta actuación forma parte do control que está levando a cabo a Consellería do Mar para vixiar a extracción ilegal de centolo, que permanece vedado ata o vindeiro 7 de novembro na provincia de Pontevedra –de Corrubedo ata A Guarda-.

Así, o Servizo de Gardacostas inspeccionou varias zonas, entre as que se atopaban os portos do Xufre e Meloxo. Tras a inspección, os axentes fixéronse con 252 quilos de centolo, 22 quilos de reló e 6 quilos de nécora. Tamén procederon á incautación dos 12 salabardos que contiñan as especies.

A Consellería do Mar lembra á cidadanía que o consumo de marisco extraído e comercializado de xeito ilegal pode supor un risco para a saúde ao non ter pasado ningún tipo de control que o avale. Por iso pide ao consumidor que non compre produto fóra das vías legais de comercialización.