PRESENTADA A WEB www.cambadosenoturismo.com

 Esta mañá foi presentada no Museo do Viño de Cambados a nova páxina web www.cambadosenoturismo.com, unha nova ferramenta coa cal o Concello continúa coa súa aposta pola promoción do enoturismo.

Na páxina, que contará cun enlace permanente dende esta mesma páxina, ofrécese información sobre as adegas, así como únha completa guía virtual coa cal descubrir Cambados. Tamén conta cunha bolsa de emprego relacionada co sector enoturístico, así como cunha guía de eventos que se irá actualizando.

A Ruta do Viño Rías Baixas celebra a posta en marcha da nova web centrada en enoturismo promovida a través do seu asociado, o Concello de Cambados: www.cambadosenoturismo.com A presentación da mesma desenvolveuse esta mañá e nela participaron o concelleiro de Enoturismo, José Ramón Abal Varela; a presidenta do GDR Salnés 21, Lourdes Ucha Varela; a directora do Museo do Viño de Cambados, Rocío Acha, e o  xerente da empresa Achega Comunicacións, encargada da posta en marcha da web, Pedro Tasende. Ao acto tamén acudiu o presidente da Ruta do Viño Rías Baixas, Juan Gil Araujo, ademais doutros representantes institucionais, adegueiros e traballadores do sector enoturístico que mostraron o seu apoio á iniciativa.

Facendo gala do seu título como membro da Rede Europea de Cidades do Viño, o Concello de Cambados acaba de poñer en marcha un portal web, a través do seu novo departamento de Enoturismo, pensado para os amantes do mundo veu. Nel pódese consultar toda a información que un enoturista debe saber sobre este municipio e os da comarca do Salnés. Así, móstrase unha listaxe específica de adegas da zona, especificando que existen 9 visitables, 7 delas asociadas da Ruta do Viño Rías Baixas. Complétase a lista con aquelas empresas que tamén dispoñen de aloxamento, entre as cales se encontran outros socios da Ruta.

Para completar a visita ás adegas tamén se mostran os principais lugares de interese turístico da vila, como son o propio Barrio de Cambados ou o de Fefiñáns. Do mesmo xeito, as novas tecnoloxías incorporáronse a este portal web, que tamén ofrece unhas prácticas audioguías, así como códigos QR a través dos cales o visitante pode acceder á información que necesita desde o seu móbil. Para aqueles que prefiren as redes sociais tamén poderán atopar os espazos de Cambados Enoturismo en Facebook, Twitter, Instagram e Google+.

Desde a Ruta do Viño Rías Baixas valoraron moi positivamente a posta en marcha de "este proxecto, que vén reforzar a importancia do enoturismo non só en Cambados, senón tamén na subzona de Val do Salnés, a que rexistra maior número de visitantes durante o ano. Por tanto, non podemos máis que felicitar ao Concello de Cambados por esta iniciativa que esperamos poida atraer maior número de turistas non só a este municipio senón tamén a toda a Ruta do Viño Rías Baixas", afirman.