A GARDA CIVIL DETIVO A 4 PRESUNTOS TIMADORES

A Garda Civil detivo catro persoas en Vilanova de Arousa como os presuntos autores dun intento de timo a unha veciña da vila. Os detidos querían venderlle un billete de lotaría supostamente premiado. 
A detención tivo lugar no centro da vila. Ata tres patrullas chegaron para deter os supostos timadores. Son tres homes e unha muller. Dous deles ían andando mentres os outros dous esperaban nun BMW aos seus cómplices.

Ao parecer ían cunha muller á que pretendían enganar vendéndolle un billete de lotaría supostamente premiado e que aínda non cobraran por un valor inferior ao premio.
Segundo algunhas testemuñas, supostamente a muller xa fora ao banco e estaban a esperala. Foi daquela cando os axentes se lles botaron enriba.

Os detidos, que teñen acento do centro da península, acabaron no cuartel de Cambados onde investigan o caso. Despois quedaron en liberdade á espera que de os cite o xulgado para declarar, debido a que non cometeron delito ningún, tan só o intentaron.
Horas antes xa o intentaran en Vilagarcía, onde a pretendida vítima non caeu no engano e foi capaz de anotar a matrícula do coche en que ían e denunciar os feitos. Isto permitiu localizar e deter os presuntos delincuentes.