200.000 EUROS PERDIDOS EN SUBVENCIÓNS

O BNG é consciente de que hai moitos aspectos da xestión económica municipal  que van máis alá da capacidade de autoxestión dun concello. Pero tamén consideramos prioritario que un concello debe implicarse na loita contra o desemprego dispoñendo os mecanismos que favorezan o desenvolvemento xeral do municipio (infraestruturas, formación, xestión …) e mesmo, de forma directa, creando os postos de traballo cando corresponda. E, por suposto, cando se está a falar de creación de postos de traballo o BNG ven defendendo, desde hai tempo, a transparencia que supón realizar un control sobre os procedementos de contratación ou selección de traballadores e traballadoras por parte do concello; aspecto que debe ir da man da elaboración de listas de contratación para a cobertura, con carácter temporal, de postos de traballo no concello (aspecto que xa manifestamos en diferentes ocasións).

O que debe quedar claro é que para o BNG, desde o concello, non se pode perder a oportunidade de solicitar as axudas públicas para a creación de novos postos de traballo e, en especial, o concello debe poñer todos os mecanismos para que a nosa mocidade poida acceder a un traballo digno sen ter que

someterse á vontade dos alcaldes e concelleiros de turno, senón polos seus méritos. Precisamos dunha mocidade formada, libre e responsable que participe activamente na creación dun futuro digno para Cambados. Esa é unha das razóns polas que criticamos a penosa xestión que Aragunde leva feito nos últimos anos respecto das solicitudes para acadar axudas públicas; concretamente referímonos ás subvencións para a contratación dun Técnico de Emprego ou Axente de Desenvolvemento Local. Un tipo de subvención pública que o concello pediu e recibiu ata o ano 2005 e que deixou de solicitar desde ese ano ata a actualidade. En total durante nove anualidades non solicitou estas subvencións, sen que houbese ningún impedimento legal para seguir facéndoo. A desidia e incompetencia do PP neste tema, fixo que o concello deixara de percibir, en total, sobre 200.000 € para a contratación do correspondente persoal e iso, contando co Xefe Territorial como amigo. Iso si, despois o PP diranos que no concello está a facer unha gran xestión económica. O BNG aposta claramente por outro tipo de xestión, unha xestión áxil e eficaz en contraposición a este modelo de xestión ou, mellor dito, de carencia de xestión do PP.