YAYO DAPORTA PON O BROCHE FINAL AO FORUM GASTRONÓMICO DA CORUÑA

A última xornada do Fórum Gastronómico da Coruña tivo como visitante ilustre (e moi sorprendido por todo o que vía) o presidente da Xunta, Alberto Núñez Feijoo. E foron varios cociñeiros paisanos seus os outros protagonistas da xornada. Javier Olleros, del Culler de Pau (O Grove),  Iván Domínguez, do restaurante Alborada, a Coruña e Yayo Daporta, do restaurante que leva o seu nome en Cambados, demostraron que a nova cociña galega pisa firme, reivindicando por riba de todo o excelente produto autóctono de Galicia, tanto o do mar coma o de terra. Peixes, mariscos, algas, hortalizas, carnes de vacún e galos ou porcos celtas convértense en ingredientes fundamentais desta nova cociña atlántica, que tamén aposta forte pola sostibilidade.

Prato de Yayo Daporta

Iván Domínguez, que ten unha estrela Michelin, céntrase sobre todo no mar, aínda que tamén emprega as verduras que cultivan os monxes do Mosteiro de Sobrado. Na súa cociña utiliza dende a pescada, en caldeirada de mariscos e algas, ata peixes menos habituais como o pinto, un peixe de rocha que presenta no prato coas súas aletas, de vistosa cor, pasando polas vieiras, que potencia cunha alga coñecida como ramallo de mar, ou polo polbo, ingrediente dun orixinal prato xunto a tendóns de tenreira e berenxenas. Sempre os peixes con coccións moi curtas, para respectar o seu sabor e a súa textura. Pola súa banda, Javier Olleros presentou pratos como o picado de mencía e albariño, un caldo integrado por fondos de algas e de marisco e puré de nabiza, ensalada de algas, e ourizos con miolo de tenreira. E Yayo Daporta, xurado tamén dun coñecido concurso de televisión, presentou a súa actualización da cociña de sempre con pratos como a versión moderna da empanada de xoubas, un ceviche de ostras de Cambados ou o xurelo asado con pan de millo e unha nova volta ao cocido galego, na foto.