ACORDO DE MÍNIMOS PARA O CERCO GALEGO

Cada barco do cerco galego poderá pescar un tope de 3.000 quilos á semana, tras o acordo asinado este xoves en Madrid entre a Secretaría Xeral de Pesca do Ministerio de Agricultura, Alimentación e Medio e o sector do cerco da zona do Golfo de Cádiz e do Cantábrico.

O secretario da Asociación de Armadores de Cerco de Galicia (Acerga), Alberto Castro, foi quen informou da nova e quen se queixou de que "realmente non é nada co que se pescaba hai anos, pero é o que hai".
Este xoves acordouse que as 9.000 toneladas de tope de captura de sardiña que para este ano ten España se repartirán nun 40 por cento para o Golfo de Cádiz e un 60 por cento para o Cantábrico, 3.600 e 5.400 toneladas, respectivamente.
Así as cousas, a pesqueiría da sardiña abrirá o 1 de marzo. Deste modo, cada zona deberá distribuír as súas capturas durante os nove meses que estará aberta a pesqueiría, xa que pecha en decembro, xaneiro e febreiro por veda e parada ambiental.