VISITA A CATRO CEMITERIOS GALEGOS

No Día de Todos os Santos, unha data moi sinalada no calendario galego, cando os cemiterios se enchen de flores e as familias lembran os seres queridos que xa non están, o programa “Vivir Aquí”  da TVG achegouse  a catro camposantos emblemáticos da nosa terra, lugares que se están a converter en atractivo turístico, o coñecido como “necroturismo”, que xa conta cunha gran tradición en toda Europa, pero que en España aínda está a dar os seus primeiros pasos.

O percorrido comeza no cemiterio de San Amaro, na Coruña, que conta con 200 anos de historia e atesoura un gran valor cultural, histórico e artístico. Neste camposanto están soterrados galegos ilustres como Eduardo Pondal, Manuel Murguía, Curros Enríquez e Wenceslao Fernández Flórez.

O espazo da TVG tamén visitou o cemiterio de Fisterra, deseñado polo arquitecto César Portela, que destaca pola súa orixinalidade e pola súa privilexiada situación aos pés do faro da localidade. Este conxunto acumula desde a súa construción numerosos premios e galardóns a nivel mundial.

Nesta ruta polos cemiterios galegos, os reporteiros de “Vivir Aquí” atoparán un monumento histórico-artístico e un dos máis fermosos de España: o camposanto que se sitúa xunto as ruínas de Santa Mariña de Dozo, en Cambados, unha igrexa gótica construída no século XV. 
  Finalmente, o programa fai un percorrido nocturno polo cemiterio de San Froilán, en Lugo, que se está a promover como un elemento máis do patrimonio da cidade, dada a riqueza das construcións funerarias que alberga o recinto e en consonancia coa progresiva desaparición do tabú supersticioso que pesa sobre os lugares de enterramento.                          

O programa foi emitido o dia 1 nun par de dias estará dispoñible na web da TVG VIVIR AQUÍ