A CIG VOLVE DENUNCIAR CONVENIOS DA XUNTA COA PRENSA

O sector da Autonómica da CIG-Administración denuncia a falsa austeridade do goberno do PP, que mantén as partidas destes convenios coas mesmas contías que no 2011.

A Consellería de Economía e Industria publica no DOG do 27 de febreiro os convenios subscritos no último cuatrimestre do 2012 no que aparecen outros 300.000 € para diferentes grupos editoriais de prensa galega. Esta asignación únese aos 450.000 € do resto deste tipo de convenios que subscribiu esta consellaría durante o ano 2012 (DOG de 2 de novembro).

O gasto total desagregado sería de 150.000 € para cada unha das 5 seguintes entidades: Editorial Compostela, S.A.,La Voz de Galicia, S.A., El Progeso de Lugo, S.L., El Faro de Vigo, S.A. e La Región, S.A.

Este tipo de convenios resultan moi polémicos dada a súa finalidade: difundir actuacións da consellaría a cambio de cartos. “Basicamente é un instrumento legal que teñen as distintas consellarías para incrementar a súa publicidade institucional e ter de man diversos medios”, subliñan.

Porén cuestionan que malia a súa legalidade, “non resulta moral que se manteñan intactos este tipo de gastos na situación actual de recortes en educación, sanidade, despedimentos, reducións salariais, perda de dereitos…”.

Dende o sector da Autonómica da CIG-Administración cren necesario seguir denunciando estes casos falsa austeridade e demandan que cese o uso dos convenios de colaboración “para repartir cartos públicos de xeito pouco transparente e coa única finalidade de autopromoción”. Máis tendo en conta que este gasto “non está exento de sospeita sobre o condicionamento da realidade que publican os medios conveniados”.

Subliñan que non se pode consentir que “parte dos esforzos que nos piden vaian destinados a esta finalidade que a sociedade entende perfectamente prescindible fronte ao mantemento dos servizos públicos”.