DURO GOLPE AO FURTIVISMO

Axentes do Servizo de Gardacostas de Galicia, dependente da Consellería do Medio Rural e do Mar, requisaron máis de 1.100 aparellos de pesca e comisaron máis de 340 quilos de peixe e marisco en diferentes operativos realizados polo litoral galego durante a semana pasada. Os inspectores da Xunta tamén se fixeron con 500 metros de artes de enmalle.

Na ría de Arousa houbo varios operativos que deron como resultado a incautación de 672 aparellos e o comiso de preto de 172 quilos de distintas especies de peixe e marisco. A actuación máis relevante foi na Mesa do Con, na que se incautaron 184 nasas e 38 cacharros de plástico para polbo e se comisaron 64 quilos de nécora e polbo.

Por outra banda, na ría de Vigo os gardacostas requisaron 100 nasas, 50 metros de artes de enmalle e máis de 50 quilos de peixe e marisco, a maioría polbo. O operativo máis destacado foi en Cíes, no que os axentes incautaron as 100 nasas e 15 quilos de polbo.

A ría de Ferrol tamén foi escenario de varios operativos que se saldaron coa incautación de 83 aparellos de pesca, a maioría nasas que non estaban correctamente sinalizadas, e 22 quilos de marisco, a maioría polbo. Os axentes tamén requisaron 150 metros de artes de enmalle.

En Fisterra os axentes incautaron 75 nasas de madeira sen identificar e 41 quilos de polbo. Ademais na ría de Corcubión, os gardacostas realizaron unha actuación en Sardiñeiro e Punta Barra Brens na que requisaron 40 nasas de madeira que estaban sen identificar, 300 metros de arte de enmalle tamén sen identificar e 10 quilos de distintas especies de peixe e marisco. Outra actuación realizada na ría de Muros e Noia saldouse coa incautación de 141 artes de pesca, a maioría cacharros de polbo sen identificar, e co comiso de 40 quilos de polbo.

Por outra banda, nun operativo na ría do Barqueiro os axentes comisaron máis de 3 quilos de peixe e noutra actuación de control de comercialización realizada en Ourense en colaboración co Seprona da Garda Civil requisaron máis de 3 quilos de peixe de talla antirregulamentaria.