A QUERELA CONTRA BENITO GONZÁLEZ POLO "TRAGOVE", ARQUIVADA

A querela presentada por presunta fraude de subvencións contra o que é patrón maior da Cofradía de Cambados e presidente da Federación Galega de Cofradías, Benito González, será arquivada. Un informe pericial encargado polo xulgado instrutor de Cambados corrixiu as cifras que se manexaban na denuncia polas que se deduciu un suposto delito de fraude de subvencións baseándose nunha sobrevaloración do barco auxiliar da cofradía cunha subvención outorgada pola Consellería do Mar e a Unión Europea.

O fiscal de Delitos Económicos acaba de solicitar o arquivo do caso ao admitir a peritación xudicial que valora a construción do buque en 231.047 euros, cantidade superior aos 161.179 euros fixados na querela, que é a mesma que referenciou a Administración no expediente de reintegración polo que se lle esixiu á cofradía a devolución parcial da subvención.

A diferenza entre o importe presupostado e o fixado pola peritación xudicial diminúe en pouco máis de 60.000 a cantidade subvencionada de forma indebida como tamén resulta inferior a axuda de fondos comunitarios. O fiscal argumenta que aínda que desde xaneiro de 2013 a fraude aos orzamentos comunitarios é delituoso desde os 4.000 euros, non pode aplicarse dita reforma con carácter retroactivo en prexuízo dos imputados, Benito González e dous administradores dos Astilleros Polináutica, SL, onde se construíu o barco, aos que se lles implicaba no delito de estafa como cooperadores necesarios.

A subvención foi solicitada en febreiro de 2009 ante a Consellería do Mar e a UE para a construción do barco da cofradía de nome Tragove e outorgada en agosto de 2010 por importe de 176.104 euros, sendo o custo da embarcación de 293.000. Varias denuncias de asociados á cofradía provocaron unha inspección de técnicos da Xunta que constataron a sobrevaloración do barco ao non superar os 161.000 euros de custo. Un desfase que obrigou á consellería a esixir a devolución parcial da axuda por importe de 84.000 euros. Coa subvención pretendíase cubrir o 60% do orzamento do barco e para iso tramitáronse os expedientes ante a Administración cos prezos e facturas supuestamente alterados coa finalidade de obter o diñeiro, denunciara o fiscal.

Con esta é a segunda denuncia que se arquiva contra Benito González. A anterior foi aberta por presunta malversación de caudales públicos a raíz da denuncia presentada pola Asociación Galega de Mariscadores (Agamar) nun xulgado de Santiago e arquivada logo de tres anos de investigacións. A candidatura de González non obtivo o apoio suficiente nas eleccións ás cofradías galegas que se celebraron o pasado domingo, logo de 14 anos á fronte do pósito de Cambados. Desde 2009 preside a Federación Galega de Cofradías.