OS RIAS BAIXAS TRIUNFAN NOS PREMIOS BACO

Os viños da D.O. Rías Baixas da 2013 veñen de recibir nove galardóns nos premios Baco 2014, un certame  que mide a calidade dos viños novos do Estado. Os 45 catadores pertencentes á Unión Española de Catadores valoraron 382 viños inscritos. O resultado para a D.O. Rías Baixas foi un gran ouro, 4 ouros e 4 pratas, confirmándose nesta edición como a denominación de orixe galega máis premiada e como unha das mellores valoradas a nivel estatal.

En concreto, o Gran Baco de Outro foi para Alba Martín, de Adegas Martín Códax. Os 4 Bacos de Outro foron para La Val, Lagar de Cervera, Lagar de Costa e Lagar da Condesa, mentres que os Bacos de Prata foron para Aravo, de Beira Aral; Gran Novas, de Aldea de Abaixo SAT; Martín Códax, das adegas do mesmo nome, e Pazo de Villarei, de Adegas Pazo de Villarei.

As outras denominacións de orixe galegas tiveron un recoñemento máis discreto. Neno, de Adegas Viña Somoza, pertencente á D.O. Valdeorras, obtivo un Baco de Ouro; mentres que Guitián Joven, de Adegas A Tapada, e tamén da D.O. Valdeorras obtivo un Baco de Prata, o mesmo premio que Terras do Cigarrón, de Viñas e Adegas Galegas e pertencente á D.O. Monterrei.