O PP NEGA AOS CIDADÁNS A TARXETA SOCIAL PORQUE A PIDEN OS SOCIALISTAS

O PP INCUMPLE AS SUAS PROPIAS LEIS.
OS SOCIALISTAS DENUNCIAN QUE O GOBERNO GALEGO CONVERTEU A LEI GALEGA DE SERVIZOS SOCIAIS EN “PAPEL MOLLADO”.

A portavoz de Política Social do Grupo Socialista, Carmen Gallego, acusou onte á Xunta de converter a Lei Galega de Servizos Sociais, aprobada en 2008, en “papel mollado”. Así o dixo no debate dunha proposición non de Lei do Grupo Socialista para que a Xunta poña en marcha a tarxeta social galega, logo de que o PP anunciara o seu rexeitamento.

Gallego lembrou que a posta en marcha de dita tarxeta é unha obriga establecida por aquela Lei e que o goberno galego tiña que tela habilitado antes de seis anos, para rematar coa dispersión de procedementos para os usuarios e usuarias de servizos sociais e que evitaría a estigmatización social destes cidadáns e cidadás.

A proposta socialista reclamaba así o cumprimento dunha medida destinada a favorecer a percepción dos beneficios programados polas distintas administracións, para todas as persoas con dereito de acceso aos servizos sociais, aos beneficios da Lei de autonomía persoal e ás persoas con discapacidade.

Explicou que esta tarxeta daría por exemplo acceso aos dereitos das persoas con discapacidade, o recoñecemento das deducións do sistema tributario ou taxas municipais, transporte público, tarxeta de aparcamento, formación ocupacional ou vivenda, entre outros. Permitiría en definitiva identificar a tódalas persoas diante das institucións e dar acceso ao seu expediente social básico.