O PROXECTO DUNHA PRAZA DE ABASTOS MODERNA

A Deputación de Pontevedra destina 72.479 euros á redacción do proxecto básico e de execución das obras de remodelación e modernización da praza de abastos e da lonxa vella de Cambados, segundo se recolle no convenio de colaboración que asinarán ambas as dúas administracións.

Praza actual

O obxectivo desta actuación é impulsar a transformación da antiga praza de abastos de Cambados nun mercado moderno que sexa referente na comercialización de produtos de calidade, ao tempo que se  contribúe á dinamización do centro urbano da vila.

Neste sentido, a redacción do proxecto dá continuidade ao Plan Director de Reordenación da zona portuaria de lonxa e mercados do porto de Cambados-Tragove, no que se definen as necesidades de mellora desta área e que xa no seu día foi licitado e adxudicado pola Deputación de Pontevedra.

Unha vez establecido este Plan Director, o Concello de Cambados formalizou un protocolo co Ministerio de Fomento e a Consellería de Economía e Industria para levar a cabo os traballos de remodelación e modernización da praza de abastos e da lonxa vella, pero o antedito protocolo non inclúe o financiamento da redacción do proxecto, do que agora se encargará a Deputación Provincial.

Mercado moderno

O proxecto deberá recoller os servizos actuais da praza de abastos e da lonxa vella, pero tamén fórmulas para dar resposta a todas aquelas necesidades e demandas que debe atender un mercado moderno.

A área comercial contará cun mercado minorista tradicional, que concentre os postos que habitualmente veñen desenvolvendo alí a súa actividade, e un mercado maiorista complementario. Así mesmo, estará dotado dunha área de degustación e restauración que contemple unha dotación de establecementos e postos dedicados a produtos elaborados propios da zona.

Completarase cos servizos de consigna, sanitarios, servizo de gardería infantil -co fin de axudar a conciliar a vida familiar e laboral–, área de dirección e xerencia, quiosco, bar e servizo de venta de prensa, entre outros que se consideren oportunos.

A superficie estimada será de 3.200 metros cadrados, repartíndose do seguinte xeito: 1.150 metros para a área do mercado tradicional, 750 destinados a área de maioristas, 800 para actividades complementarias e 500 para a área de servizos, accesos e comunicacións verticais.

O custe estimado destes traballos de remodelación e modernización ascende a uns 3.600.000 euros.