CAMBADOS VI. UN LUGAR FERMOSO (GASTRONOMÍA)

Cambados é un destino ideal para o viaxeiro que goza do bo xantar con produtos de primeira calidade. Recoñecido como Capital do Viño Albariño, tamén o é por ser o único porto de Galicia onde se permite a extracción de vieira, sendo este molusco outro produto estrela da vila, ao que se dedican unhas xornadas de exaltación na época estival. A ría de Arousa, a máis extensa de Galicia, é moi rica en peixes e mariscos. Cada día, mariñeiros e mariscadoras traen á lonxa cambadesa os mellores produtos do litoral, onde os restaurantes adquírenos para elaborar os seus exquisitos menús.

 

Cambados conta con numerosas taperías, marisquerías e restaurantes de longa tradición, aos que se van unindo outros de cociña elaborada e de deseño. Todos utilizan sempre os mellores produtos do mercado, os máis frescos e os de mellor calidade.

O viño albariño, o peixe, o marisco, as conservas e os produtos da horta son imprescindibles para os nosos restauradores, quen logran que os padais máis esixentes recorden Cambados como un lugar onde comer non é unha necesidade, senón un pracer.