PROXECTA ESPECTACULARES ESCENAS DE CICLISMO

Espectacular mostra de escenas de ciclismo nas rúas Real e Príncipe

O fotoxornalista Francis Tsang iniciou esta mañá a supervisión da instalación das 23 fotografías de gran formato da súa exposición titulada Paisajes desde el Arcén, unha escolma de imaxes captadas no Tour de Francia 2001 e 2002, así como na Vuelta a España 2012. Estes posters espectaculares, que miden 3 por 2 metros, quedaron pendurados de cables sobre as rúas Real e Príncipe, contando coa axuda dunha grúa e operarios municipais. Por debaixo pasarán os corredores participantes na etapa cronometrada por equipos da Vuelta que arranca en Vilanova o vindeiro sábado 24.

Esta vai ser unha das propostas expositivas que presente o festival Proxecta esta fin de semana en Cambados, convertida deste xeito en capital do fotoxornalismo por uns días. A outra mostra inaugúrase mañá sábado, ás 13 horas no pazo de Torrado, integrada polas fotos galardoadas no certame Estaçao Imagen 2012 do fotoperiodismo portugués e galego. Entre os premiados atopamos nomes como o do galego Miguel Riopa, e os portugueses Antonio Pedrosa (por “Iraquianos”), Pedro Cunha, Mario Cruz, Paulo Pimenta, José Antunes, Ricardo Meireles e Rui M. Oliveira, entre outros.

O festival Proxecta creouse hai 5 anos facéndoo coincidir coa data do 19 de agosto que conmemora o Día Mundial da Fotografía. O acto cumio desta gran cita co mellor fotoxornalismo vai ser o sábado, a partir das 22.30 horas, cando doce grandes nomes do reporteirismo gráfico internacional amosarán distintas series de fotos na proxección que se vai realizar na pantalla instalada no histórico marco da praza de Fefiñáns.