MOITAS EMPRESAS DA PROVINCIA PASAN DA DEPUTACIÓN

Tras ver unha información da Deputación de Pontevedra temos claro que algunhas empresas da provincia so están interesadas en que esta teña a ben darlle traballo porque polo que se ve non colaboran cando as necesitan para dar formación a xente desempregada. Cecáis se cobraran por elo habería máis colaboración. Outra causa pode ser que aunque Louzán augure unha pronta saída da crise os empresarios non son tan optimistas e non queren contratar a ninguén máis. Aínda que sexan subvencionados pola Deputación.

O prazo para que as empresas privadas se adhiran ó II Plan de práctica laboral da Deputación de Pontevedra, a través do cal se lles concederán bolsas a 400 titulados universitarios e de ciclos superiores de FP, cunha finalización prevista para o 31 de agosto, ampliouse en 10 días hábiles segundo a resolución publicada hoxe no BOPPO.(Páxina 20)

Poden presentarse as empresas con sede social na provincia de Pontevedra, de calquera natureza xurídica e sector, sempre e cando cumpran cos requisitos de non ter contrato de servizos coa Deputación, que a súa actividade estea relacionada co perfil das titulacións demandadas ou que non realizasen despedidos improcedentes, entre outros.

Á hora de seleccionar as empresas puntuarase cun máximo de cinco puntos o proxecto de práctica laboral e con ata catro puntos o deseño de itinerarios alternativos de inserción que lle dean opción ó bolseiro de ter continuidade na empresa.

A cooperación entre o organismo provincial e as empresas da provincia que resulten beneficiarias materializarase a través dun convenio no que se establezan os dereitos, as obrigas e os compromisos de cada unha das partes.

Determinación do perfil

Esta primeira fase permitiralle á Deputación determinar a demanda de bolseiros existente para, baseándose nela, abrir a fase de selección de titulados. Unha vez decididas as titulacións e as prazas que se convocan farase a convocatoria pública e procederase á selección dos traballadores.

Os beneficiarios deste plan serán titulados sen experiencia laboral previa, menores de 35 anos, ós que se lles vai ofrecer a oportunidade de desenvolveren labores relacionados coa profesión na que se formaron en diversas empresas da provincia.