CONCERTOS DO ALBARIÑO 2013

Aos poucos vaise coñecendo o cartel de concertos da Festa do Albariño de Cambados. Chenoa, Julieta Venegas e o galego Roi Casal poñerán a música nas noites da festa máis grande da vila.

O cartel abrirao o mércores 31 de xullo o catoirense Roi Casal, segundo recolle a web do Agadic, e  ao día seguinte a cantante Chenoa, que volverá á praza de Fefiñáns once anos despois de que o fixese por primeira vez, tamén nun Albariño. Foi o ano da eclosión do programa televisivo Operación Triunfo e por Cambados deixáronse ver ese verán ata catro triunfitos acompañando a Rosa López, entón Rosa de España, á cabeza.Xunto a Chenoa actuará David Civera no marco da XVI Gala do Albariño máis outros artistas pendentes de confirmar.

Desde o Concello informan de que se seguen pechando contratos pero a web oficial de Chenoa non deixa lugar a dúbidas; o xoves 1 de agosto estará en Cambados. A actuación do venres descoñécese, soa con forza Melendi pero na sua web non aparece nada sobre Cambados. Pero a que si xa transcendeu é a do sábado 3 de agosto, para cando se espera á mexicana Julieta Venegas. A entrada a todos os concertos da Festa do Albariño será gratuita .