CADA VEZ MÁIS GALEGOS EN RISCO DE POBREZA

A incidencia da crise económica provocou que a taxa de cidadáns galegos en risco de pobreza se incrementara en só un ano nun 1,45 por cento, ata o punto de que o 15,73 por cento dos habitantes da Comunidade galega sofren perigo de non dispoñer de ingresos abondos para afrontar as necesidades básicas.

A enquisa de condicións de vida das familias, que este venres publica o Instituto Galego de Estatística (IGE) con datos relativos a 2011, sitúa a maior incidencia do risco de pobreza na poboación entre 16 e 24 anos de idade, tramo da poboación no cal o 22,43 por cento dos mozos están nesta conxuntura.

Ademais, tamén é elevada a incidencia no tramo de idade de 0 a 15 anos, xa que o 20,83 por cento dos nenos galegos está en risco de pobreza. O grao de exposición á escaseza de recursos aumenta en todos os grupos de idade no último ano, salvo no que agrupa aos maiores de 65 anos de idade, no que retrocede un 0,87 por cento.

En canto á análise por xénero, o estudio do IGE conclúe que o risco de pobreza afecta practicamente na mesma proporción a homes e mulleres en Galicia, aínda que un pouco por enriba no caso feminino. Non obstante, as maiores necesidades sitúanse, con diferenza, entre os inmigrantes, ao estar o 41,51 por cento da poboación estranxeira residente na comunidade en risco de pobreza.