OS AFECTADOS POLAS PREFERENTES ENDURECERAN AS PROTESTAS

Afectados o domingo do Albariño en Cambados

Afectados polo "engano" na adquisición de participacións preferentes de Novagalicia Banco decidiron "endurecer" as manifestacións públicas para reclamar a devolución dos seus investimentos, segundo determinouse o venres pola noite nunha reunión de plataformas de toda Galicia celebrada en Pontevedra.

"Decidiuse actuar sobre quen ten que axudarnos na solución, que é o señor Núñez Feijóo", comentou  unha portavoz da plataforma de Vigo, que asistiu ao encontro xunto a uns 45 representantes doutras 30 agrupacións galegas.

As novas protestas, con datas aínda por concretar pero que se planean para un día entre o 10 e o 20 de setembro, incluirán concentracións ante a sede de presidencia da Xunta en Santiago, o Parlamento galego e o Instituto Galego de Consumo.

Unha portavoz de Pontevedra comentou  que o ambiente da reunión foi "caldeado" tras anunciarse o contido da nova regulación sobre as preferentes, que limita as opcións dos afectados para reclamar, aínda que "non pecha a vía xudicial".

"Non nos gusta nada", comentaron respecto da nova normativa.

Aínda que o clima xeral é de unidade, existen diferenzas entre plataformas respecto de que postura adoptar sobre as arbitraxes que auspicia a Xunta, segundo comenta esta portavoz.

Entre as actuacións previstas, as plataformas estudan tamén realizar algunha acción con motivo do paso da Volta a España polas súas respectivas comarcas. "Algo pacífico, sen cortar vías nin paralizar a carreira", advirten.

Xesús Domínguez, portavoz dos afectados polas participacións preferentes na comarca de Santiago, tamén expresou onte o seu temor de que a nova norma que regulará as preferentes lles "expolie" o 70 por cento dos seus aforros, e reclamou da Xunta que a impugne cando se aprobe.

Así o declarou ante a central de Novagalicia Banco na praza de Galicia de Compostela, onde un reducido grupo de afectados empapelou cristais e a porta do edificio con carteis nos que se podía ler "Devolución do cen por cento dos aforros. Goberno solución. Ladróns, devolvédenos o noso".