O PSOE PIDE A PARALIZACION DAS OBRAS DE CORRELO EN CASTRELO

O PSOE de Cambados esixe a paralización das obras en Correlo, Castrelo, por facerse sen acordo cos veciños.

As maquinas iniciaron obras ocupando propiedades particulares sen actas previas, movendo marcos e postes.

Os Socialistas de Cambados comparten a indignación dos veciños de Castrelo afectados polas obras de construción dunha senda litoral na zona de Correlo que, segundo os veciños, lévase adiante sen acordo con eles e afectando notablemente os seus intereses.

O Portavoz Rafael Blanco manifestou que estanse a invadir propiedades e a retirar terras e marcos de propiedades privadas, non hai actas previas que marquen a cantidade de metros cadrados que se lle quita a cada propietario, etc. É un claro abuso de poder por parte do Concello e do Alcalde.

Os Socialistas insisten en que na reunión celebrada fai un par de meses non se acadou ningún acordo cos veciños xa que a maioría non quixo ceder terreos nin acordaron iniciar procesos de expropiación ou similares. Agora, ante a sorpresa dos afectados, as máquinas invaden as súas propiedades e alteran e modifican as súas condicións, marcos, etc, sen notificación algunha.

Esiximos a inmediata paralización destas actuacións mentres que non se proceda a actuar baixo o amparo da legalidade, se levanten e asinen as actas oportunas e se midan os terreos afectados para esta actuación -manifestou o Portavoz Municipal e Secretario Xeral Rafael Blanco- e nós estaremos cos veciños para evitar unha actuación arbitraria e de claro abuso por parte do Concello. Responsabilizamos a Luis Aragunde do que está a pasar en Correlo e demandamos que se poña a solucionar o tema urxentemente. Esta é a forma de facer do PP, abusar con aleivosía e sen miramentos.

•