CHAMAMENTO DE BEIRAS A UNION

O voceiro do Encontro Irmandiño, Xosé Manuel Beiras, compareceu este mércores no que el mesmo denominou "aparición" para abordar o proceso de construción dun novo referente nacionalista, para o que a súa formación está a participar nas asembleas do denominado Novo Proxecto Común, que o próximo 14 de xullo celebrará a súa asemblea constituínte.

Así, fixo un chamamento á cidadanía, por un lado, a participar nese proceso, pero tamén a outros "grupos interesados nunha alternativa dun novo referente" para que "se faga todo o posible para confluír", en referencia a 'Compromiso por Galicia', colectivo no que están integrados Máis Galiza, Acción Galega e Ecosocialistas.

En todo caso, esa "confluencia" á que apela Beiras sen que lle "doian garantías" --como describiu-- ten como "condición" que a "confluencia sexa de cidadáns". "O diálogo entre grupos debe continuar, pero a confluencia debe ser de persoas", manifestou en rolda de prensa o histórico nacionalista, que explicou que a súa decisión de non falar ante os medios con anterioridade foi para deixar "en exclusiva o protagonismo" aos cidadáns do Novo Proxecto Común.

Así, e tras disertar acerca do contexto acerca da situación de crise económica, que tamén viu de "valores", e tras comparar o momento actual "coa segunda restauración borbónica", "análoga ao franquismo" e de "perda de soberanía"; Beiras subliñou que o "horizonte" de construción dun novo proxecto debe ser o de "protagonismo" da cidadanía. "Hai que dar garantías de que o proceso é de abaixo a arriba, e que se vai á construción dun movemento co que se vehiculice na estanza política mediante unha ferramenta e non a un partido convencional que sexa o motor dende arriba", explicou.

Ademais, tamén fixo un relato da construción do colectivo Novo Proxecto Común, que naceu de asembleas por toda Galicia e que o 2 de xullo creou unha coordinadora de asembleas en "autoconvocatoria". O pasado 16 de xuño convocou a asemblea constituínte para o 14 de xullo, momento no que tamén este grupo chama a participar a todos os cidadáns, e colectivos, que busquen conformar unha alternativa nacionalista.

ALGO NOVO E "ATRAENTE"

En todo caso, Beiras fixo fincapé en que hai que facer "algo que resulte atraente" e citou ao movemento de 'indignados' e o seu lema de "non nos representan" para insistir na necesidade de que un novo proxecto non pode ter corte de partido. Con iso, fundamentalmente, explica que se trata de aglutinar nun "movemento" á pluralidade cidadá, evitando direccións partidarias clásicas.

"Algo que resulte atraente, non só para a xente que levamos militado en organizacións determinadas, sexa o BNG ou outras, ou cidadáns organizados en grupos máis pequenos", manifestou antes de apelar a "unha alternativa atraente para a cidadanía descolgada" da vida política e que vexa que "pode participar na construción de algo que non vai ser igual".

"Para que non derive en algo análogo ao que aquilo sentíronse defraudados eses enormes de continxentes de masa crítica da esquerda e non nos confinar nunha disputa por un espazo xa existente", apostilou Beiras, que pide un movemento sen "lindes, sen cancelas".

Na súa intervención, Beiras falou de "reconfluencia" entre os colectivos, porque, segundo manifestou, xa houbo un momento en que había unhas premisas compartidas que logo se dividiron e que, agora, aposta por que se unan. A xuízo do líder do Encontro Irmandiño, hai tempo para conformar unha alternativa electoral e, neste sentido, si considerou que un fraccionamento non sería positivo. "Estamos a favor de impedir un fraccionamento", proclamou, referíndose á súa condición de voceiro de Encontro Irmandiño.

"NON PECHO A PORTA"

Ao ser preguntado por se el sería o candidato nas próximas eleccións dun novo referente político, afirmou que iso non é a súa "pretensión". "Eu non estou niso, se tivese a pretensión ou considerase que Beiras é o que pode resolver as cousas como candidato encabezando listas, en lugar de facer todo o chollo que estou a facer, estaría a traballar un directorio", ironizou.

Neste sentido, insistiu na súa argumentación afirmando que, en lugar de traballar "por todo o país" estaría "perfecto nunha peana, levado por romaxes, pero esta vez non a pé". Deseguido, e preguntado se pecha a porta a iso, remachou: "Eu non pecho a porta a nada, eu non creo que me exprese demasiado mal".

"DEREITA PATRIOTEIRA QUE PON O CU"

No seu discurso, Xosé Manuel Beiras negou que o nacionalismo estea en crise na "sociedade". "Non ten menos vixencia ou menos forza como movemento social, a conciencia da identidade, non está menos forte que hai 10 anos, o que hai é moita xente que atopaba nunha organización política frentista a referencia e que moita desa xente chegou á conclusión de que non é así", analizou.

Dito isto, afirmou que "hai moita máis crise na socialdemocracia" que no nacionalismo galego. "Hai máis crise no PP, que andan a hostias uns e outros, e onde señores como Mariano Rajoy, o señor dos 'hilillos' son vistos como monigote por poderes de fóra, tanto políticos como financeiros... O que pasa é que dunha crise se fala, porque claro, e doutras fálase porque claro", manifestou Beiras, quen criticou que "esa dereita patrioteira agora lle está a poñer o cu aos poderes da troika".